DILI, 21 Maiu 2025 (TATOLI)—Ministra Edukasaun, Dulce de Jesus, hateten, Ministériu Edukasaun (ME) iha obrigasaun atu garante kualidade eskola internasionál sira ne’ebé estabelese iha rai-laran.
“Ministériu Edukasaun iha obrigasaun importante tebes atu garante sé de’it mak loke eskola iha Timor, eskola ne’ebé iha kualidade, liuliu eskola sira ne’ebé hatene sira-nia an eskola internasionál,” Ministra hateten hodi responde preokupasaun husi membru Komisaun G iha Parlamentu Nasionál (PN) ne’ebé trata asuntu Edukasaun, Juventude, Desportu, Kultura no Sidadania, bainhira halo audiénsia públika, kuarta ne’e.
ME fó sai ona kritériu sira ba eskola estabelesidu iha territóriu.
“Ministériu hato’o ona eskola sira ne’ebé mak priense ona kritéria iha prosesu nia laran, seidauk priense kritéria no ne’ebé seidauk rejistu, ho kategoria oin hira atu haree eskola internasionál sira ne’e,” nia akresenta.
Notísia relevante : ME suspende lisensiamentu operasionál ba eskola internasionál
Governante ne’e hateten, maski eskola ne’e internasionál maibé ME iha obrigasaun importante tebes atu garante sé de’it mak loke eskola iha Timor tenke iha kualidade.
“Liuliu eskola sira ne’ebé hatene sira-nia an eskola internasionál Timor nia oan selu karun, pelumenus balun la karun liu, maibé kompara ho eskola públika sira, sira-nia presu a’as liu, entaun ita tenke garante katak povu nia oan no inan-aman sira selu eskola, maibé hetan eskola ne’ebé kualidade,” Ministra katak.
Iha parte seluk, Prezidente Komisaun G, Armando Lopes, preokupa iha eskola internasionál balun iha manorin-na’in mak ho diploma sekundáriu.
Jornalista : Nelson de Sousa
Editora : Julia Chatarina
