DILI, 28 Maiu 2025 (TATOLI)—Ministru Juventude Desportu Arte no Kultura (MJDAK), Nelyo Isaac Sarmento, hateten entre nasaun sia (9) ne’e to’o agora nasaun ualu (8) mak konfiramdu ona, maibé Brazíl mak seidauk konfirmadu atu haruka atleta no delegasaun mai partisipa jogu Komunidade Nasaun Ko’alia Lian Portugés (CPLP-sigla portugés) iha Timor-Leste.
Notísia Relevante: Timor-Leste nia preparativu ba jogu CPLP iha faze importante tolu
“To’o agora ita rejista ona atleta hamutuk 528 husi nasaun membru sira ho klasifikasaun hanesan; Angola mai ho ema 110, Cavo Verde mai ho ema 89, Guíne Bissau mai ho ema 34, Portugál mai ho ema 111, São Tome e Principe mai ho ema ema 35, Timor-Leste ema hamutuk 105, Brazíl mak to’o agora seidauk konfirmadu no sira atu mai ho atleta hira. Inisiu ne’e dehan sira atu mai ho aviaun rasik, aviaun militár mak atu lori sira mai, maibé to’o agora ita seidauk hetan informasaun detallu,” Governante ne’e hateten ba Agência TATOLI liuhusi programa “Entrevista Eskluziva” ho topiku “Preparasaun ni Importánsia Jogu CPLP iha Timor-Leste” iha estúdiu TATOLI, iha Faról, kuarta ne’e.
Nia dehan, nasaun sira iha Afrika, Angola mak fasilita aviaun no sei aranka hamutuk mai Timor-Leste.
“Angola hakarak hatudu nia laran di’ak, nune’e atleta sira husi Afrika sei konsentra hamutuk iha Angola mak aranka mai Timor. Angola mai lori atleta husi São Tome e Principe, Guine Bisau, Mocambique no Cavo Verde. Sira mai ho aviaun boot, ita sei koordena ho Ministériu Transporte Komunikasaun atu haree hodi autoriza ho kondisaun hotu atu aviaun ne’e para iha ita-nia nasaun,” Ministru ne’e hateten.
Tanba ne’e, delegasaun hotu husi nasaun membru sira sei to’o Timor-Leste iha loron 17 fulan-Jullu 2025 ne’e sira iha hotu ona Timor-Leste, hodi tuir kompetisaun internasionál ne’e.
Tuir informasaun ne’ebé Governu hetan husi Portugál sei mai ho aviaun rasik no lori mós fasilidade balun atu apoiu ba jogu CPLP iha Timor-Leste.
“Ita halo komunikasaun ona ho embaixada sira iha ne’e atu tulun malu hodi aselera prosesu hotu bele la’o di’ak ba oin. Ami-nia koordenasaun di’ak tebes inklui ho imigrasaun atu haree fasilita ita-nia atleta sira mai labele hein kle’ur tenke trata sira ho espesiál,” nia dehan.
Governu prepara ona Otel ualu ba delegasaun CPLP
Aleinde ne’e, Gpvernante ne’e hateten Governu Timor-Leste prepara ona Otél ualu (8) ba delegasaun husi nasaun sia (9) ne’e hodi hela.
“Ita prepara ona Otél ualu ba ita-nia delegasaun sira atu mai ne hela. Ida-ne’e mak ita tenke konfirma ho númeru ne’e loloos, atu nune’e iha 17 Jullu ne’e Otel, sira preparadu no mamuk hotu ona ba atleta sira,” Nelyo dehan.
Otél ne’ebé Governu prepara, Governante ne’e seidauk públika sai Otel sira-nia naran no sei públika iha tempu besik. Nune’e Otel sira-ne’ebé Governu prepara iha kondisaun ne’ebé di’ak ba duni delegasaun sira hanesan hahan ne’ebé di’ak no fatin deskansa ne’ebé seguru.
“Otél, ha’u labele ko’alia sai lai iha ne’e maibé Otel-na’in sira iha ona koñesementu tanba ami nia koordenasaun ho sira di’ak tebes. Ita iha mós limitasaun ba transporte maibé tanba ita koordenasaun di’ak ho Ministeriu Finansa liuliu patrimoniu Estadu atu apoiu kareta hodi tula ita-nia delegasaun sira,” Ministru ne’e dehan.
Kona-ba ai-han ne’ebé mak atleta sira atu konsumu, nia dehan, ida-ne’e kontroladu tanba Ministeriu Saúde liuliu parte nutrisaun nian maks ei konrola, atu nune’e bele fó garantia ai-han ne’ebé kualidade ba atleta sira.
“Ita koordena ho Ministeriu Saúde sira nutrisaun ne’e atu haree ba hahan sira atleta sira-nian, atu hahan ne’e, ita hakarak aihan sira ema haan ne’e di’ak ba ema-nia saude la’ós halo ema moras,” nia hateten.
Jornalista : Hortencio Sanchez
Editór : Cancio Ximenes
