BOBONARU, 02 Juñu 2025 (TATOLI)—Sentru Atendementu Agrikola Kuda Ulun Bobonaru (CAAKUB, sigla portugés), daudaun ne’e hahú tetu hare-kulit husi agrikultór sira iha postu administrativu Maliana no Kailaku.
Prezidente Sentru Atendementu Agrikola Kuda Ulun Bobonaru (CAAKUB), António Barreto, hateten asosisaun planeia iha tinan ne’e hakarak sosa hare-kulit tonelada 200 ho presuu kada kilograma ida ho sentavu $0,40 no $0,50.
Notísia Relevante: CAAKUB sosa hare-kulit tonelada 23 iha 2024
“Ohin loron, ami tun ona terrenu sosa hare. Ida-ne’e, ita bazeia ba dekretu-lei 15/2015 husi Sentru Lojistika Nasionál (CLN) agora sei validu hela. Bainhira ita mak ba tetu iha komunidade nia fatin ho folin sentavu $0,40, tanba sira la selu transporte. Se sira mak lori mai mak ita sosa ho sentavu $0,50 kada kilo ida tanba transporte sira mak selu,” Nia informa ba jornalista sira, iha kna’ar fatin, segunda ne’e.
Nia konfirma, hare-kulit ne’e rekolla husi grupu agrikultór 28 ho totál membru 300-resin ne’ebé hamahan-aan iha Asosisaun ne’e, maibé la taka dalan mós ba agrikultor sira seluk ne’ebé la envolve iha grupu.
Hare-kulit ne’ebé CAAKUB tinan-tinan sosa ho tipu hare-mean, hare-metan no hare-mutin ho variedade tolu hanesan Sihera, IR64 no Nakroman.
“Ami-nia planu mak sosa tonelada 200 maibé dalaruma la to’o ami-nia meta tanba ita-nia produsaun ne’e tun-sa’e de’it, ne’ebé ha’u husu ba agrikultór sira hasa’e produsaun. Maibé, importante liu ninia kualidade, tanba ita-nia merkadu iha li’ur ne’e kompradór sira presiza ninia kualidade,” nia dehan.
Agrikultór postu administrativu Kailaku, João Letto Mali Lopes, hateten deside lori direta hare-kulit mai faan iha armajen CAAKUB tanba satisfas ho presu kada kilograma ne’ebé sentru atendementu ne’e fó sai.
“Ha’u mai hanesan individual, la tama iha grupu. Ohin, ha’u mai lori hare-kulit kilograma 50 ho saka 80 no se la sala tonelada 20. Ne’e rezultadu ne’ebé ami hetan no ami uza balun ba han, no balu ami faan para uza nesesidade sira seluk hanesan selu oan ba eskola,” nia dehan.
Enkuantu, hare-kulit hirak ne’ebé CAAKUB sosa sei dulas sai foos, hafoin distribui ba faan iha merkadu lokál no nasionál inklui restaurante iha kapitál Maliana.
Notísia Relevante : António Barreto lidera CAAKUB periúdu 2021-2023
Jornalista : Sergio da Cruz
Editór : Cancio Ximenes
