DILI, 03 Juñu 2025 (TATOLI)–Institutu Nasionál Kombate HIV-SIDA, Institutu Públiku (INCSIDA, I.P) hamutuk ho liña ministeriál sira seluk halo limpeza jerál iha tasi-ibun hahú husi Embaixada Xina to’o Palásiu Governu, iha ámbitu semana oseanu no ambiente.
Atividade ne’e organiza husi Gabinete Fronteira Marrítima ho tema “Ha’u-nia tasi ha’u-nia Timor”, ne’ebé atividade ne’e hahú ona desde 01 Juñu no sei remata iha 05 Juñu.
“Limpeza ida-ne’e ho objetivu Dili sai sidade ne’ebé furak liu maka ema tenke hamoos no ema mós tenke iha konsiénsia katak labele hafoer tan Dili ne’e tanba Dili la’ós ema ida ka rua nian, Dili ema hotu nian. Entaun, ema hotu-hotu tenke iha konsiénsia atu kuidadu Dili bele sai furak liu,” Prezidente INCSIDA, Daniel Marçal, hateten ba jornalista sira iha tasi-ibun área Farol, Tersa ne’e.
Notísia relevante : INCSIDA-AMD sensibiliza prevensaun vírus HIV-SIDA ba autoridade sira
Nia nota, durante ne’e iha ema balun laiha konsiénsia, soe lixu arbiru, tanba ne’e sujere atu Governu kria regra ida bainhira iha atividade limpeza tenke envolve mós komunidade, la’ós entidade Governu mak hamoos de’it tanba atu asegura ambiente tasi ne’ebé moos ema hotu tenke kontribui halo limpeza.
“Ema ida tuur iha tasi-ibun laiha ema ida tuur haree fali ema seluk nia serbisu tuir loloos ne’e, ema hotu ne’ebé hela iha Dili bainhira to’o tempu hamoos hanesan ne’e ema hotu-hotu tenke hamoos. Ita hamoos ba oin sira halo foer fali iha kotuk, balun lae. Dehan fali ema sira-ne’ebé serbisu iha Governu mak halo serbisu, ne’e ita seidauk iha konsiénsia ida,” nia katak.
Prezidente institutu dehan, atividade ne’e bele envolve ema husi suku to’o aldeia, maski foer sira-ne’e nia impaktu ba HIV-SIDA laiha, maibé impaktu ba saúde.
“Ita iha labarik hira mak bá halimar iha tasi-bee tama bá sira-nia ibun ne’e bele fó moras ba sira. Agora tasi-ibun iha sidade ida nia oin kedas, entaun tenke mobiliza limpeza husi Tasi-tolu to’o Kristu Rei, no se mak la hamoos ninia uma oin ne’e tenke fó sansaun ba sira,” nia katak.
Atividade ne’e Governu kria ona mapamentu ka oráriu limpeza ba entidade Governu ne’ebé tutela ba iha Gabinete V-PM I no V-PM II, aleinde ne’e mós partisipa husi entidade husi naun governamentál no universitáriu sira.
Jornalista : Alexandra da Costa
Editora : Julia Chatarina
