DILI, 03 Juñu 2025 (TATOLI) – Autoridade Aviasaun Sivíl Timor-Leste (AACTL, sigla portugés) sertifika Aeroportu Internasionál Rota do Sândalo Oekusi.
Prezidente Autoridade Rejiaun Admninistrativu Espesiál Oekusi, Rogério Tiago Lobato, hateten sira-nia parte hatama ona pedidu ba AACTL, atu sertifika internasionalmente Aeroportu Rota do Sândalo, nune’e iha futuru aviaun semo direta bá Oekusi.
“Tanba ita iha Imigrasaun, Alfándega, aviaun sira bele semo diretamentu mai Oekusi”, Rogério Lobato hateten iha Palásiu Governu hafoin hasoru malu ho Primeiru-Ministru, Xanana Gusmão, ohin.
Iha sorin seluk, Prezidente AACTL, Zezinho António Gusmão, informa sira-nia parte horisehik simu ona pedidu husi RAEOA atu halo avaliasaun ba Aeroportu Rota do Sândalo molok setrifika.
“Iha tempu badak ami-nia ekipa sei bá halo assessment ba fasilidade aeroportu ne’e rasik, hodi haree prienxe ona kritériu husi Organizasaun Internasionál Aviasaun Sivíl [ICAO] ne’ebé fó mai AACTL implementa hanesan aeroportu tenke garante ekipamentu adekadu, jestaun seguransa, lisensa no seluk tan”, dehan.
Tuir nia, avaliasaun mak foin bele determina data ba setrtifikasaun, ne’ebé bele fulan ne’e, la’e fulan oin, maibé AACTL esforsu másimu.
Iha serimónia sertifikasaun ne’e rasik sei partisipa husi Ministru Transporte no Komunikasaun, Miguel Marques Manetelu, maibé entidade sira hanesan Prezidente Repúblika no Primeiru-Ministru ne’e kompeténsia ministériu mak sei organiza.
Lembra katak, iha 18 Maiu 2024, Autoridade Rejiaun Administrativa Espesiál Oekusi Ambeno (RAEOA), selebra akordu ho Aeroportu no Navegasaun Aérea Timor-Leste, Empreza Públika (ANATL, E. P), kona-ba operasionál aeroportuária ba futuru sertifikasaun Rota do Sândalo.
“Akordu ne’e atu haree kona-ba operasionál aeroportuária nian, depois ANATL sei prepara akordu no regra balun tan, nune’e prepara ba iha operasaun no sertifkasaun aeroportu”, Prezidente ANATL, E.P, Romualdo da Silva, hateten ba jornalista sira iha Aeroportu Rota do Sândalo Oekusi.
Akordu kooperasaun ne’e espesífiku liu ba ANATL atu haree, prepara operasaun aeroportu ne’e rasik, kona-ba sertifikasaun aeroportu nian. AACTL mak sei haruka karta ba iha ANATL, depois ANATL sei prepara buat hotu, nune’e bele submete ba iha AACTL atu verifika ekipamentu sira iha Rota do Sândalo.
“Bainhira buat hotu prienxe ona rekizitu hafoin mak AACTL aprova, nune’e ita loke ona vou internasionál ba nasaun hotu atu mai, maibé fasilidade iha aeroportu ne’e di’ak liu aeroportu Komoro. Presiza ami hadi’a uitoan buat balun ne’ebé ladún di’ak, atu asegura nune’e operasionál bele la’o ho di’ak”, katak.
Notísia relevante: RAEOA-ANATL selebra akordu ba operasionál aeroportu Rota do Sândalo
Jornaslita: Arminda Fonseca
Editora: Maria Auxiliadora
