DILI, 03 Juñu 2025 (TATOLI) – Deputadu sira preokupa ho ahi-suar ka poluisaun ne’ebé maka’as iha lixeiru Tíbar, nune’e bolu atensaun Governu nian ba kestaun ne’e.
Deputadu CNRT, Ricardo Baptista, preokupa ho jestaun lixeiru Tíbar tanba ahi-suar maka’as ne’ebé taka metin tiha estrada husi lixeiru to’o rotunda.
“Ha’u la hatene ida-ne’e akontese kuaze semana rua nia laran”, deputadu ne’e levanta iha sala plenária.
Nune’e nia husu entidade kompetente atu haree ba jestaun lixeiru Tíbar hodi labele fó impaktu ba populasaun sira ne’ebé hela besik iha área ne’e.
Lamentasaun hanesan mós mai husi deputadu PD, Mariano Xavier Malik, tanba bainhira sunu lixu ne’e, nia suar afeta tebes ba komunidade. “Ahi-suar ne’ebé sunu husi lixeiru Tíbar ne’e komesa tama to’o mai ona iha Delta, tanba ne’e husu atu haree didi’ak hodi labele afeta ba saúde, ba respirasaun ita-nia povu nian”, nia preokupa.
Aleinde ne’e, deputada CNRT, Maria Angela Gorubelo, levanta problema kona-ba sidadaun sira kontinua so’e lixu arbiru iha fatin turístiku Kristu Rei nian. “Governu presiza tau CCTV iha ne’ebá hodi implementa koima”, rekomenda.
Nia nota mós maski Governu halo kampaña oioin, maibé ladún iha impaktu pozitivu, liuliu joven sira ne’ebé ba hala’o atividade iha ne’eba la respeita no kontinua soe lixu arbiru.
Iha reuniaun plenária ne’e la marka prezensa husi reprezentante Governu, liuliu Vise-Ministru ba Asuntu Parlamentár, Adérito Hugo, maibé reprezenta husi tékniku sira no rejista preokuasaun sira ne’e hodi haruka ba parte relevante atu toma atensaun.
Sidadaun iha sidade Dili hamutuk rihun 300-resin, kada loron prodús lixu tonelada 220, ne’ebé tama ba lixeiru Tíbar 55%, enkuantu tama iha ezgotu no tasi laran 45%.
Kada populasaun prodús 0,80%-0.85% lixu kada loron, nune’e hosi populasaun millaun 1,3-resin iha territóriu tomak prodús lixu tonelada 930 kada loron.
Notísia relevante: Reprezentante povu iha PN preokupa ho poluisaun ahi-suar husi lixeira Tibar
Jornalista: Nelson de Sousa
Editora: Maria Auxiliadora
