DILI, 05 Juñu 2025 (TATOLI) – Parlamentu Nasionál (PN) prioritiza hodi diskute lejizlasaun no tratadu sira ba adezaun plena Timor-Leste ba Asosiasaun Nasaun Sudeste Aziátiku (ASEAN, siglá inglés).
“Iha lei lubun ida, ha’u la lembra, balun iha hela komisaun no balun ami aprova ona”, Prezidente Parlamentu Nasionál, Maria Fernanda Lay, hateten ba Tatoli, iha otél JL World, Metiaut, Dili.
Nia garante katak lejizlasaun no tratadu sira ne’ebé presiza kumpre ba prosesu adezaun nian ne’ebé parte Governu haruka ba órgaun lejizlativu ne’e sei fó prioridade halo diskusaun no aprovasaun molok to’o fulan-Outrubru 2025, ne’ebé Timor-Leste sei sai ofisialmente membru plenu.
“Ha’u hanoin iha prosesu adezaun, hanesan señor Hun Sen [Prezidente Senadu Kamboja] mai hato’o katak, ita la’ós halo buat hotu kompletu, maibé ita iha kompromisu polítiku entre polítiku sira no Governu bainhira iha lejizlasaun ruma. Ami mós bele prosesa lalais hodi hato’o nia objetivu”, akresenta.
Nia dehan iha lei balun ne’ebé haruka ba Parlamentu la tuir kontestu Timor-Leste nian no devolve ba Governu hodi hadi’a tiha mak haruka fali mai.
“Lei balun mai ita iha kontestu World Trade Organization [WTO] no balun iha ASEAN nian ne’ebé tenke kompleta malu. Klaru Governu iha difikuldade, dalaruma lori mai la tuir loloos kontestu Timór nian”, realsa.
Nia salienta hanesan proposta Lei Propriedade Industriál haruka fila hodi hadi’a, tanba, halo lei ne’e ba Timór labele kópia fali seluk lori de’it mai, tenke esplika iha objetivu lei ne’e iha espozisaun motivu tanba sá mak halo lei ne’e ba Timór.
Parlamentu rasik kria ona komisaun eventuál akompañamentu ba prosesu adezaun Timor-Leste ba ASEAN. Komisaun ne’e hala’o knaar atu trata no diskute lejizlasaun no tratadu sira liga ba Timor-Leste nia adezaun ba ASEAN.
Notísia relevante: Uniaun Europeia apoiu Komisaun C haree lejizlasaun ba adezaun ASEAN
Jornalista: Nelson de Sousa
Editora: Maria Auxiliadora
