BOBONARU, 05 Juñu 2025 (TATOLI)—Administradór postu administrativu Bobonaru, munisípiu Bobonaru, Tomas Henriques, tersa (03 Juñu 2025), submete pedidu no komunidade husu Governu liuhusi Ministériu Obra Públika atu konsidera pedidu reabilitasaun estrada rurál no ponte ki’ik ho boot eziste iha suku 18 atu reabilita.
Notísia Relevante: MOP halo levantamentu dadus topografia estrada Maliana-Bobonaru
“Ami-nia administradór horibain-rua ne’e lori ona karta ba hatama tiha iha edifisíu Obra Públika, ne’eduni ami husu atu konsidera ka tau iha planu prioridade hodi resolve tanba ami-nia estrada iha postu Bobonaru, liga husi Maliana sa’e mai to’o Bobonaru villa, liga ba suku-suku ne’e kuaze aat grave mak barak, Udan boot ne’e, strada sira-ne’e hanesan taho ho bee mak nakonu,depois ponte ki’ik-oan sira ne’e barak mak bee-mota estraga hotu, karreta atu liu susar la halimar,” Reprezentante Komunidade Postu Administrativu Bobonaru, Fernando de Jesus, informa ba Agência Tatoli,I ha Oat Kaboke, kinta ne’e.
Nia afirma, infraestrutura bázika liuliu estrada no ponte sai problema sériu iha postu administrativu Bobonaru, tanba difikulta tebes komunidade atu halo movimentu iha tempu bai-loro no udan.
Fernando dehan, tinan hirak liuba Institutu Jestaun Ekipamentu no Apoia Dezenvolvimentu Infraestrutura, Institutu Públiku (IGEADI, I.P) Brigada Maria-Tapo konsege halo ona normalizasaun maibé la dura.
“IGEDI mai ateru rai hadi’a tiha, karreta sama udan tau -tan aat fali, nia rezultadu mak ita haree agora ho tahu mak nakonu, entaun karreta ho motor liu araskatanba ko’is-namdoras. Hanesan estrada husi Maliana sa’e mai Oe-leu sira dudu hela ne’e, tanba ami husu ba na’i-ulun sira atu aprova osan para hadi’a tiha ami-nia estrada sira-ne’e. Tanba, ami atu lori ai-han lokál ba faan iha merkadu mós araska, moras ruma atu lalais ba Maliana mós la di’ak,” nia hateten.
Aleinde ne’e, Abitante suku Karabau, Bendita Fernandes Abu, reforsa pedidu ne’ebé Administradór Postu Administrativu Bobonaru submete ne’e hanesan aspirasaun povu nian ne’ebé durante tinan 20-resin ona enfrenta no halerik kona-ba ponte no estrada.
Tuir nia, presiza duni halo reablitasaun ba Estrada rural, nune’e bele fasilita tranporte públiku no privadu ka komunidade bele la’o ba-mai.
“Ami povu ne’e presiza mak eletrisidade, bee no Estrada. Buat ahi ho bee ami iha ona, hela estrada liga husi postu ba suku ne’e mak tinan-tinan ami sempre loke ibun hela de’it. Depois na’i-ulun sira mós ba mai haree ho matan hela maibé nafatin laiha mudansa, lahatene ami Bobonaru ne’e nusa karik,” nia dehan.
Enkuantu, foin lalais ne’e, ekipa Tékniku Ministériu Obra Públika halo ona levantamentu dadus topografia ba estrada ho totál distánsia kilometru 18 hahú husi Santa-Kruz Maliana ba to’o merkadu Asudai, suku Ilat-laun, postu administrativu Bobonaru.
Jornalista : Sergio da Cruz
Editór : Cancio Ximenes
