BOBONARU,12 Juñu 2025 (TATOLI)—Superintendente Edukasaun Munisípiu Bobonaru, Noémia da Silva Manuel Leite, apela ba Dirijente Eskola no Ekipa Jestaun Programa (EJP) atu halo kontrola másimu ba fornesimentu ai-han iha eskola sira liuhusi programa Merenda Eskolár.
“Problema ne’e sériu no bele fó ameasa ba ema-nia vida. Tanba ne’e apela ba dirijente eskola sira no Ekipa Jestaun Programa atu halo kontrolu másimu ba ai-han ne’ebé fornesidór sira kompra, nune’e labele fó efeitu negativu ba estudante sira-nia saúde,” Superintendente Edukasaun Munisípiu Bobonaru, hateten iha ninia knaar fatin, Kinta ne’e.
Nia mós husu ba fornesedór sira hotu iha munisípiu Bobonaru atu tau-atensaun maka’as ba kualidade produtu no ai-han molok prepara no fornese ba estudante sira.
“Modo ikan sira imi hola ne’e fresku k lae? na’an sira mós fesku ka lae? tanba iha eskola balun mós ami deteta na’an la fresku, iis dois, signifika tau iha jelera maibé sira tenke obriga tein. Entaun ida-ne’e mós bele prejudika ba labarik sira-nia saúde,” nia akresenta.
Antes ne’e, bazeia ba informasaun ne’ebé ekipa Diresaun Servisu Munisipál Edukasaun, Autoridade munisípiu Bobonaru rekolla iha terrenu, nota katak estudante na’in-16 husi Eskola Ensinu Báziku Filiál (EBF) Budin, suku Batugade, postu administrativu Balibo, iha Kinta (12/06) tuku 12:00 resin evakua ba fasilidade saúde hodi hetan asisténsia médika hafoin konsumu ai-han Merenda Eskolár ho menu ikan tongkol.
Hafoin akontesimentu ne’e, Servisu Edukasaun Munisípiu Bobonaru, Autoridade Munisípiu Bobonaru no Parte Servisu Saúde Munisipál bá kedas terrenu hodi haree direita no rekolla informasaun.
“Ami to’o iha ne’ebá, halo kedas entrevista hanesan investigasaun oituan ba fornesidór ne’e, ha’u husu dehan ita-boot prepara ai-han ne’e oinsá? hola ikan ne’e iha ne’ebé? sé mak fa’an ikan ne’e?, ikan ne’e fresku ka lae?. Ha’u dala-lia hela maibé abitante balun, kala inan-aman balun, sira dehan ikan ne’e la fresku, tau iha jelera, ikan ne’e mai husi Atambua. Ami la to’o bá fatin fa’an ikan ne’e, ne’ebé la hatene tebes ou la’e,” nia haktuir informasaun ne’ebé rekolla direita husi fornesidór no komunidade.
Notísia Relevante : Estudante na’in-16 Eskola EBF Budin evakua bá postu saúde hafoin konsumu ai-han
Superintendente Edukasaun dehan, durante ne’e fornesedór sira sempre hola ikan tasi.
“Sira dehan mnu ikan ami sempre hola iha maun ne’e maibé la lanu hanesan ne’e, ha’u mós konsege husu dehan antes tein ne’e ita-boot fase ka lae? ou tau netik buat ruma, sira dehan antes tein ko’a hotu depois tempra tau derok ho masin. Ha’u husu tan ita-boot konsege loke ikan nia tilun haree ka lae? nia dehan ami la konsege loke, depois ha’u husu tan dehan sosa ne’e oinsá tasak ka lae? sira dehan ami sona tasak duni, haree ba mean mak hasai hanesan baibain ami sona ne’e, soke ami la espera depois ema-nia oan sira han hotu bele sai hanesan ne’e,” nia tenik.
Estudante afatadu sira mós deklara katak hafoin konsumu ai-han Merenda Eskolár ho menu ikan tongkol mosu kedas sintoma hanesan oin ho isin mean hotu, provoka oin lanu, ulun moras no balun muta to’o dezmaia.
Superintendente Edukasaun ne’e katak, deklarasaun ne’ebé estudante sira hato’o hanesan informasaun de’it maibé to’o agora seidauk hatene kauza husi akontesimentu ne’e tanba sei iha prosesu analiza laboratóriu.
“Ami tama haree labarik na’in-tolu mak tau-soru, ha’u konsege dada-lia ho labarik sira ne’ebé afatadu, ha’u husu nia tanba saida? nia dehan ami han ikan maka Lanu, ha’u sente ha’u nia hirus-matan ho kabun mak manas los, senti labele maibé agora ita seidauk bele hatene loloos ninia kauza tanba médiku sira sei lori amostra ai-han bá analiza iha laboratóriu, sira dehan hein tan oituan lai tanba bele to’o semana ida, loron rua ka tolu hanesan ne’e,” nia hato’o.
Notísia Relevante : Estudante rihun 29,078 iha Bobonaru sai benifisiáriu ba PME 2025
Tuir dadus ne’ebé Diresaun Servisu Edukasaun Bobonaru rekolla, estudante ne’ebé asesu programa Merenda Eskola tinan 2025 hamutuk na’in-29.078, kompostu husi Ensinu Baziku no Pre-Eskola Públiku 2.516 no Ensinu Báziku no Pre-Eskolár Katolika 2.562.
Programa nasionál ne’e implementa iha eskola públiku 179 kompostu husi Ensinu Baziku 137 hanesan Ensinu Baziku Sentrál (EBC, sigla portugués) 23, no EBF 114, no Ensinu Pre-Eskolar 32.
Ensinu Baziku no Ensinu Pre-Eskola Katoliku hamutuk 24, kompostu husi EBC eskola 6, EBF 10, Ensinu Pre-Eskola Katólika 8.
Totál orsamentu ba programa Merenda Eskolár tinan 2025 ba Munisípiu Bobonaru $1.758.783,60, montante ne’e fahe ba Ensinu Baziku Públiku no Katoliku $1.564.829,28 ho totál loron efetivu 141, enkuantu Pre-Eskolar Públiku no Katólika hamutuk $193.954,32 ba loron efetivu 174.
Jornalista : Sergio da Cruz
Editora : Julia Chatarina
