DILI, 13 Juñu 2025 (TATOLI)—Komunidade afetadu ba libertasaun fatin hodi halo alargamentu estrada iha aldeia 05 no 06, Lorumata, daudaun ne’e hahú sobu ona ida-idak ninia hela fatin.
Antes ne’e, ekipa konjunta lidera husi Sekretaria Estadu Asuntu Toponímia no Organizasaun Urbana (SEATOU) alerta ona ba komunidade katak Governu sei loke dalan hahú husi sede Komite Sentrál FRETILIN (CCF, sigla portugés) to’o tasi-ibun Embaixada Amérika.
Abitante, Gilberto Augosto, hateten, sira-nia parte hakarak koopera ho Governu hodi sobu rasik sira-nia uma, maski balun hela iha rai privadu, entaun daudaun nia ho família hahú sobu sira-nia hela fatin.
“Iha semana kotuk ekipa konjunta sira mai fó avizu atu ida-idak sobu ninia uma, nune’e ami mós hahú sobu maibé Governu keta haluha ami-nia indenizasaun tanba antes ne’e ami hatama ona dokumentu sira ba Ministériu Obra Públika,” Gilberto Augosto hato’o iha Lorumata, Sesta ne’e.
Notísia relevante : SEATOU alerta informasaun ba komunidade afetadu alargamentu estrada iha Lorumata
Nia dehan, hanesan sidadaun ida hakarak koopera ba dezenvolvimentu maibé Governu presiza prosesa karta aseitasaun, tanba Governu sempre troka mandatu no Governante sira mós mai ho planu la hanesan.
“Ami mós nafatin ezije karta indenizasaun husi Terra no Propriedade, tanba komunidade koopera ona hodi sobu rasik uma maibé Governu mós tenke prosesa lalais,” nia katak.
Iha sorin seluk, Xefe suku Fatuhada, Marcelino Soares, haktuir, antes ne’e Konsellu suku fó ona avizu ba komunidade afetadu atu sobu rasik uma no loron 04 Juñu hetan orientasaun husi Sekretáriu Estadu hodi akompaña ekipa konjunta kontinua alerta ba komunidade.
“Ami autoridade lokál hamutuk ho SEATOU fó tan avizu ba komunidade atu hahú sobu sira-nia uma, tanba Governu fó tempu ba komunidade sira atu sobu rasik uma hahú husi loron 04 to’o 21 Juñu. Entaun, se komunidade la koopera, Governu mak sei tuun direta hodi sobu uma sira ne’ebé tau ona markasaun,” Autoridade lokál informa.
Nia reforsa, karik komunidade balun lakohi sobu sira-nia uma ne’e kestaun sira-nia, tanba parte Autoridade suku sempre alerta.
“Di’ak liu na’in sobu rasik nune’e bele aproveita fali ekipamentu sira ho di’ak, tanba bainhira Governu mak lori eskavatór mai sei harahun hotu ekipamentu. Aleinde ne’e komunidade balun mak ezije ona indenizasaun, maibé husu para sira halo konfirmasaun ho Terra no Propriedade tanba dalaruma dokumentu ne’ebé sira hatama la kompletu, nune’e presiza halo kompletu atubele prosesa,” nia katak.
Tuir observasaun Jornalista Ajénsia TATOLI, I.P iha terrenu, nota katak daudaun ne’e ekipa téknika husi Eletricidade de Timor-Leste (EDTL) kontinua halo desligasaun ahi ba uma sira ne’ebé antes ne’e hetan ona markasaun atu halo libertasaun fatin, nune’e bainhira iha prosesu sobu uma labele fó impaktu ba komunidade.
Uma hamutuk 100 resin hetan impaktu ba alargamentu estrada husi sede CCF to’o tasi-ibun Embaixada Amérika.
Jornalista : Alexandra da Costa
Editora : Julia Chatarina
