DILI, 04 Juñu 2025 (TATOLI)—Ekipa konjunta ne’ebé lidera husi Sekretaria Estadu Asuntu Toponímia no Organizasaun Urbana (SEATOU) hamutuk ho líder suku Fatuhada, no membru seguransa Ai-mutin alerta informasaun ba komunidade afetadu ba alargamentu estrada iha aldeia 03 no aldeia 05, Lorumata.
Ekipa iha tempu badak sei halo despeju administrativa ba uma-kain ne’ebé hetan ona markasaun, nune’e bele loke espasu tan ba estrada hahú husi sede Komité Sentrál FRETILIN (CCF, sigla portugés) to’o tasi-ibun Embaixada Amérika nian.
Sekretáriu Estadu Asuntu Toponímia no Organizasaun Urbana, Germano Santa Brites Dias, hateten, atividade ohin ne’e hanesan kontinuasaun husi programa IX Governu.
“Iha parte ida-ne’e sei loke estrada hahú husi DHL no CCF nia klaran ne’e tuun to’o mai iha Embaixada Amérika, tanba ne’e mak ohin ita la’o hamutuk ho Autoridade lokál hodi fó avizu ba komunidade,” Sekretáriu Estadu hato’o ba jornalista sira, iha Lorumata, Kuarta ne’e.
Notísia relevante : SEATOU tinan ne’e prioriza serbisu levantamentu ba alargamentu estrada
Durante ne’e ekipa responsável foti ona dadus komunidade afetadu sira, husi ai-horis, uma no morru ne’ebé afetadu ba projetu estrada.
Nune’e, rejista iha uma-kain 100-resin mak afetadu, balun submete ona dokumentu ba Ministériu obra Públika (MOP) inklui Diresaun Terra no Propriedade.
“Iha balun mak seidauk submete dokumentu karik bele kontinua submete iha parte kompetente ne’e rasik. Ami fó tempu ona ba komunidade sobu rasik atubele rai didi’ak ekipamentu sira, maibé bainhira komunidade lakohi sobu rasik to’o loron ne’ebé ita determina, entaun ne’e Governu mak sei kontinua halo rasik lori eskavatór mai sobu. Entaun komunidade tenke koopera,” Governante ne’e apelu.
Sekretáriu Estadu dehan, dalan ne’e tenke halo luan tan atu nune’e karreta sira bele halo movimentu liu dalan ne’e.
“Hanesan bainhira komunidade atu halo uma presiza rai-henek no fatuk ruma karreta bele tula tama to’o laran, maibé ho kondisaun estrada klo’ot difikulta karreta sira halo movimentu iha área ne’e,” nia katak.
Iha sorin seluk, Xefe suku Fatudada, Marcelino Soares, hateten, Autoridade lokál fó ona avizu ba komunidade iha fulan-Maiu ne’e nia laran atu sira bele prepara dokumentu hodi submete bá MOP.
“Ita fó avizu ba komunidade atu sobu rasik uma atu nune’e sira bele aproveita rasik buat ruma, tanba iha semana rua mai tan ekipamentu pezadu bainhira mai apoiu hodi halo loos dalan ne’e,” Autoridade lokál katak.
Dalan ne’e sei loke espasu ho medida metru 11,50 tuir planu urbanístiku. Bainhira komunidade balun la koopera tanba uma privadu ne’e tenke hatudu evidénsia tanba Governu sei fó indenizasaun ba komunidade.
SEATOU sei fó oportunidade ba komunidade afetadu sira iha semana rua nia laran hahú husi loron 04 to’o 21 Juñu tinan ne’e, hodi sobu rasik sira-nia uma no morru sira-ne’ebé afetada. Tanba se komunidade la koopera maka mákina eskavatór mak sei sobu.
Tuir observasaun jornalista iha terrenu, nota katak komunidade balun hamoos hotu markasaun sira, tanba ne’e ohin téknika sira kontinua tau fali markasaun ba uma identifikadu sira.
Jornalista : Alexandra da Costa
Editora : Julia Chatarina
