DILI, 16 Juñu 2025 (TATOLI)—Prezidente Repúblika, José Ramos Horta, hateten nia parte preokupa liu mak oinsá atu hamenus mukit iha rai-laran hodi lori moris di’ak ba povu.
Notísia Relevante: TL sei foka problema má-nutrisaun no stunting iha asembleia jerál ONU ba dala 77
“Governu hatene, Prezidente nia preokupasaun boot-liu mak ita tenke halo polítika ne’ebé bele redús ki’ak iha rai-laran, luta kontra pobreza. Ita tenke halo polítika ne’ebé bele redús sub-nutrisaun stunting no sub-nutrisaun labarik sira-nian”, Ramos Horta hateten ba jornalista sira iha Palásiu Prezidensiál Nicolau Lobato, Bairru Pite, segunda ne’e.
Nia dehan, Orsamentu Jerál Estadu (OJE) 2026 tenke tau importánsia hodi hadi’a problema falta bee-moos tanba daudaun ne’e bee-moos sai problema boot iha nasaun ne’e.
“Tenke haree oinsá rezolve problema sira iha Timor-Leste hanesan bee-moos ba populasaun sira no saneamentu. Ida-ne’e, ha’u-nia preokupasaun boot,” nia dehan.
Aleinde ne’e, nia husu ba Governu atu hadi’a mós setór edukasaun hodi hadi’a eskola sira-ne’ebé kondisaun aat.
“Setór edukasaun tenke tau mós importansia iha tinan oin, tenke haree eskola sira hadi’a, prepara sentina ba labarik sira, tenke hadi’a merenda eskolár iha eskola sira, haree mós bee-moos ba eskola sira,” nia hateten.
Nia husu atu tau mós prioridade ba setór saúde, tanba setór ne’e importante tebes. La’ós haree de’it moras sira iha Ospitál maibé haree mós prevensaun liuhusi saúde públika no buat seluk tan kona-ba infrastrutura estrada rurál no seluk tan.
Tuir Horta, kondisaun infraestrutura báziku iha área fronteira sira hanesan Kovalima no Bobonaru iha kondisaun ne’ebé grave tebes.
“Munisípiu rua iha área fronteira sira-nia infraestrutura báziku grave tebes, hanesan Kovalima no Maliana. Ita ba karik iha Postu Administrativu sira hanesan Fatululik, Fatumea, Fohorem no seluk tan, ita hanesan abandonadu loos. Ha’u husu ona ba Primeiru-Ministru, favór oinsa hadi’a kondisaun estrada sira-ne’e iha tinan oin. Hadi’a la’ós estrada de’it, tenke hadi’a mós sira-nia edukasaun, saúde iha fronteira ne’ebá,” nia dehan.
Jornalista : Hortencios Sanchez
Editór : Cancio Ximenes
