OEKUSI, 16 Juñu (TATOLI) – Komunidade sira iha aldeia Maquelba, suku Taiboko, sub-rejiaun Pante Makasar, Rejiaun Administrativa Espesiál Oekusi Ambeno (RAEOA) husu ba Departementu Servisu Água Saneamentu (DSAS) atu hadi’a kanu bee-moos ne’ebé hetan estragu husi kompañia Internasionál Waskita Karya bainhira halo konstrusaun estrada nasionál husi Ponte Noefafan ba Oénunu.
Abitante Baptista Aut Colo, husu ba Autoridade RAEOA liuhusi DSAS, atu hadi’a urjente tanba Governu mós hapara ona konstratu kompañia Internasionál Waskita Karya hodi kontinua estrada referidu.
Notísia relevante:ADN sobu ona projetu estrada husi ponte Noefefan-Oenunu
“Ami atu kuru bee, mas sente terus liu, ami kompara uluk, di’akliu, maibé kompañia halo estrada ne’e mak estraga tiha ami-nia pipa ne’e, to’o agora la hadi’a, Governu mós hapara ona kompañia atu halo estrada ne’e, entaun se mak atu hadi’a ami-nia kanu bee?,” nia informa iha aldeia Maquelab Oekusi.
“Tuir loloos SAS mai haree ona, atubele halo kanalizasaun foun, maibé to’o agora seidauk halo entaun loron-loron ami lalin masa husi dalan do’ok mai hobur lesuk bee ne’e, dalaruma ami istória malu tanba kuru bee, balun lori masa barak, balun mai ikus depois kuru uluk, ida-ne’e mak probelema ne’ebé ami infrenta durante ne’e,” nia dehan.
Iha fatin hanesan, Cornelio Anin dehan nia sente triste tanba kada loron kuru be’e la’o do’ok ba to’o parte foho hun, Tan ne’e ha’u husu ba Governu atu hadi’a.
Hatan ba problema ne’e, Xefe Departementu SAS Oekusi, José Ili, rekoñese problema ne’eb’e komunidade aldeia Maquelab infrenta, nune’e promete iha tempu badak ekipa tékniku sei tuun direita atu halo levantamentu.
“Loos duni, dezde tinan kotuk, husi midía sira mós fó sai problema ne’e, tanba iha ne’ebé sira hetan bee-matan ida, uluk la’o di’ak, maibé hafoin hadi’a estrada ne’e mak halo estraga kanu sira, maibé iha momentu ne’ebá, husi parte SAS servisu hamutuk ho kompañia atubele koopera ho GMF atu hadi’a, maibé sira atende de’it iha estrada nian, entaun iha tempu badak ami sei identifika, oinsa bele hadi’a no kanaliza tan ba komunidade sira iha bairru atubele asesu mós liuliu parte Maquelab nian,” nia informa.
Notísia relevante:Jestór Nítibe husu autoridade RAEOA aselera konstrusaun estrada Noefefan-Oénunu
Jornalista: Abílio Elo Nini
Editór: Florencio Miranda Ximenes
