VIKEKE, 18 Juñu 2025 (TATOLI)-Xefe Sentru Saúde Postu Vikeke Villa, munisípiu Vikeke, João Corte Real, informa uma foun ba baixa ne’ebé Ministra Saúde inaugura foin lalais ne’e kompleta ona kama ba pasiente sira husi 25 ba 35.
“Agora uma foun ne’e fasilidade kuaze foun hotu, nune’e ita-nia pasiente sira baixa mós sente di’ak”, dehan nia ba TATOLI iha ninia servisu fatin, ohin.
Tuir nia, fasilidade sira ne’e sufisiente atu atende pasiente sira husi postu Osuu, Lakluta, Uatulari, Uatukarbau no Vikeke.
“Ha’u sente kama sira ne’e sufisiente hodi fó atendimentu ba ita-nia komunidade husi postu lima, maibé ami haree tempu sira-ne’ebé moras barak, ami sei aumenta kama hodi atende ita-nia pasiente”, nia realsa.
Sala internamentu foun ne’e inaugura husi Ministra Saúde, Elia A. A. dos Reis Amaral, iha loron 14 fulan-Abríl 2025 liubá.
Pasiente sira ne’ebé baixa durante ne’e iha sala internamentu hamutuk na’in-813, alta 731, refere bá Baukau 147 no ema mate ema na’in-hitu.
Notísia relevante: Governu inaugura izolamentu no armazen ai-moruk iha Vikeke
Jornalista : Vitorino Lopes da Costa
Editora : Rita Almeida
