KOVALIMA, 18 Juñu 2025 (TATOLI) – Prezidente Autoridade munisípiu (PAM) Kovalima, Miguel Armada Cardoso, kuarta-ne’e, fó atensaun ba Diretora Servisu Munisipál Edukasaun Kovalima atu kontrola diretór eskola sira tanba PAM hamutuk ho inspetór jerál Ministériu Administrasaun Estatál (MAE) monitoriza iha Eskola Bázika Sentrál (EBC) Lontale nota katak diretór eskola la hasa’e bandeira RDTL iha estabelesimentu ensinu ne’e.
“Ohin iha EBC Lontale Salele ita nota buat balun ne’ebé sekretáriu munisipál na’in-tolu atu haree no anota hanesan nakloke ita-nia aan, hanesan diretór EBC la hasa’e bandeira. Ida-ne’e hanesan erru boot ida”, Autoridade Kovalima, Miguel Armada Cardoso hato’o hafoin ho MAE monitoriza implementasaun Programa merenda eskolár iha EBC Lontale, ohin.
Notísia relevante: https://tatoli.tl/2025/05/09/implementasaun-pme-sedl-nota-alunu-konsumu-foos-importadu/
Nune’e, autoridade Kovalima ne’e fó atensaun ba diretora servisu edukasaun munisípiu Kovalima no sekretáriu asuntu sosiál atu haree no akresenta katak se bainhira la hadi’a agora bainhira mak atu hadi’a ekipa husi nasionál hala’o avaliasaun la’ós atu ba kadeia maibé presiza servisu atu hadi’a aan.
Ho nune’e Autoridade Kovalima rekoñese iha nia frakeza ne’ebé dirije husi nia rasik ne’ebé balun la’o balun iha fallansu. “Razaun tanba situasaun no kondisaun balun ka ami mak la komprende duni maibé ho ita-boot sira tulun loke ami-nia hanoin”, Autoridade ne’e rekoñese.
Entretantu, implementasaun Programa Merenda Eskolár (PME) iha Kovalima iha tinan-2025 mak hetan atensaun boot husi autoridade edukasaun no governu. Iha loron 10 Marsu, Autoridade Munisípiu Kovalima hala’o lansamentu ofisiál ba implementasaun PME iha Eskola Bázika Sentrál Lontale, ho alokasaun orsamentu total $1,165,375.68 ba pré-eskolár no ensinu báziku.
Notísia relevante: https://tatoli.tl/2025/05/20/me-hasai-ona-sirkular-kada-eskola-iha-territoriu-hasae-bandeira-nasional/
Jornalista:Celestina Teles
Editór: Rafael Ximenes de A. Belo
