DILI, 25 Juñu 2025 (TATOLI)—Ministra Saúde, Elia dos Reis Aramal, hateten prosesu rekrutamentu ba profisionál saúde sira liuhusi rejime espesiál no rejime jerál daudaun ne’e iha faze preparasaun nune’e destaka bá iha munisípiu sira hotu, atu halo atendimentu ba populasaun sira.
“Ita-nia prosesu rekrutamentu ba profisionál saúde sira la’o hela. Signifika iha ona faze preparasaun, tanba sira-ne’e ita sei destaka bá iha munisípiu sira hotu hodi halo atendimentu ba populasaun sira,” Ministra Saúde dehan ba jornalista sira iha Palácio do Governo, kuarta ne’e.
Nia dehan, hanesan moras Tuberkuloze (TB) tenke halo kompleta tratamentu durante fulan neen, entaun profisional saúde sira-ne’ebé mak rekrutadu ne’e bele ba apoiu programa sira-ne’e nune’e bele fó atendimentu di’ak ba populasaun sira iha baze.
“Rekrutamentu ne’e halo ba iha rejime jerál no rejime espesiál, tanba daudaun ne’e prosesu la’o hela. Tanba ne’e, alvu ba rekrutamentu hira-hira ne’e tempu badak mak ha’u fó hatene ba ita-boot sira, tanba daudaun ne’e ha’u laiha dadus espesífiku ida atu fó-hatene ba ita-boot sira,” nia relata.
Antes ne’e, Vise Primeiru-Ministru no Ministru Koordenadór Asuntu Sosiál, Mariano Assanami Sabino, hateten fulan-Juñu Ministériu Saúde sei rekruta profisionál saúde hodi destaka bá iha fasilidade saúde iha Timor-Leste.
Nia dehan, profisionál saúde sira balun servisu kle’ur ona, maibé nafatin kontratadu, ida-ne’e sei ko’alia ho Ministra Saúde atu konsidera sasán sira-ne’e ho di’ak.
“Profisionál saúde balun servisu kle’ur ona, maibé nafatin kontratadu, entaun ha’u ko’alia ona ho Ministra Saúde oinsá konsidera buat sira-ne’e, tanba sira mak salva ema-nia moris,” nia esplika.
Jornalista: Felicidade Ximenes
Editór: Xisto Freitas da Piedade
