DILI, 27 Juñu 2025 (TATOLI)—Diretór Ezekutivu Hospital Nacional Guido Valadares (HNGV), Nuno Vital Soares, hateten, tuir planu, tinan oin (2026) HNGV sei halo mudansa ba espasu sira.
“Tinan oin ita hamutuk ho Ministériu Saúde atu halo mudansa ba ospitál, tanba ita hareee buat barak mak nafatin sai preokupasaun ba públiku, liuliu espasu atendimentu sira. Ita mós iha ona ospitál andár lima daudaun ne’e halo hela konstrusaun, bainhira prontu ona ita sei halo mudansa totál ba HNGV tanba ita iha ona planu mestre,” Nuno Vital informa ba jornalista sira, iha ámbitu selebrasaun aniversáriu HNGV ba dala-22, iha resintu HNGV, Bidau, sesta ne’e.
Nia esplika, kuandu pasiente sira mai barak nafatin, HNGV sei muda bá iha ospitál Lahane hodi halo atendimentu iha-ne’ebá.
Nuno agradese ba komunidade nia krítika ba atendimentu iha HNGV tanba krítika nu’udár meiu ida atu hadi’a erru sira.
Iha fatin hanesan, Ministra Saúde, Elia dos Reis Amaral, informa aniversáriu HNGV ba tinan ne’e, ho tema “Hatudu Gratidaun no Esperansa iha Kuidadu ba Pasiente”, ne’ebé hatudu klaru ona valór umanista ne’ebe presiza kontinua orienta servisu hodi hatán ba moris ho dignidade, kompaisaun no kompeténsia.
“Tema tinan ne’e fó mensajen boot katak gratidaun no esperansa. Gratidaun mak hanesan rekoñesimentu ba esforsu koletivu ba profisionál sira-ne’ebé sakrifika-aan hodi serbí komunidade, ba família sira-ne’ebé fó konfiansa ba sistema saúde,” Elia haktuir.
Nia relata, Governu liuhusi Ministériu Saúde fó prioridade atu kontinua investe iha sistema saúde ida-ne’ebé sentrál ba ema-nian, pasiente la presiza de’it medikamentu, maibé pasiente presiza sente katak sira akompañadu, respeita no labele sente hanoin katak sira la importante.
Aleinde ne’e, Vise Primeiru-Ministru no Ministru Koodenadór Asuntu Sosiál, Mariano Sabino Assanami dehan HNGV ne’e hanesan ospitál Governu nian ne’ebé fó tratamentu gratuitu ba sidadaun sira.
“Ita hatene katak ema barak hela iha ita-nia rai. Sira presiza ospitál sira-ne’ebé mak kualidade di’ak. Nonu Governu nia rekoñesimentu ba profisionál saúde sira importante, tanba ita-boot sira servisu atu atende ema moras, tanba ida-ne’e misaun ita-boot sira-nian,” Mariano informa.
Jornalista: Felicidade Ximenes
Editór: Xisto Freitas da Piedade
