OEKUSI, 03 Jullu 2025 (TATOLI) – Konsellu Administrasaun Fundu Infraestrutura (KAFI) Rejiaun Administrativa Espesiál Oekusi Ambeno (RAEOA), aprova empreza tolu, Lifau Indah Unipesoál Lda, Raynaldos Unipesoál Lda no Colneno Unipesoál Lda, reabilita estrada rurál kilometru 23,5 nu’udar projetu emerjénsia, hahú husi Oénunu suku Suni-Ufe ba to’o Citrana suku Bene-Ufe perténsia sub-rejiaun Nítibe.
Tan ne’e, iha kuarta-feira semana ne’e (02/Jullu), Prezidente KAFI Oekusi, atuál Prezidente Autoridade RAEOA, Rogério Tiago de Fátima Lobato, akompaña hosi Diresaun Rejionál Infraestrura (DRI) no Ajénsia Nasionál Dezenvolvimentu Institutu Públiku (ADN,I.P). hatuur ona fatuk dahuluk hodi hahú konstrusaun.
“Projetu ne’e emerjénsia, tanba estrada iha tasi-ibun, kondisaun ladi’ak, presiza hadi’a hanesan estrada sira Nítibe foho. Ida-ne’e, nia intensaun atu hasai povu husi izolamentu, tanba ita haree rasik, iha tasi-ibun, estrada ladi’ak difikulta movimentu komunidade sira atu asesu ba merkadu,” Lobato, hateten iha ámbitu hatuur fatuk dahuluk, realiza iha Oénunu suku Suni-Ufe.
Autoridade RAEOA tau konfiansa ba empreza tolu ne’e tanba iha ona esperiénsia, profisionalizmu, atu ezekuta projetu alargamentu ne’e, garante nia kualidade no kumpre durasaun tempu.
“Empreza tolu ne’ebé sai konstrutora, antes ne’e imi hatudu ona rezultadu. Ne’e mak KAFI rejionál deside hodi aprova ita-bo’ot sira-nia proposta maibé Autoridade nia ejizénsia mak ne’e, tenki garante kualidade, tanba estrada ne’e halo ba ema hotu, liuliu inan-aman sira iha Nítibe,” nia fó hanoin.
Nune’e nia fó hanoin ba komunidade sira iha suku tolu ne’ebé sei hetan afeta direita mak suku Suni-Ufe, Usitako no Bene-Ufe, atu koopera servisu hamutuk ho empreza tolu ne’e, kona-ba problema rai, plantasaun sira, ekipa konjunta sei rekolla dadús, nune’e iha futuru Estadu sei halo kompensasaun.
Notísia relevante:PA RAEOA orienta empreza sira atu nahe estrada rurál ho simentu
Jestór sub-rejiaun Nítibe, Agustinho Afulit, reprezenta komunidade Nítibe, hato’o agradesimentu ba Autoridade RAEOA liuliu ekipa KAFI rejionál, tanba tau konsiderasaun ba problema estrada iha parte tasi-ibun nian.
“Ha’u lori komunidade sira, hato’o agradese ba Governu, tanba tinan kotuk reabilita ona estrada sira iha Nítibe foho hanesan Usitako Lela-Ufe to’o Lamasin, maibé tinan ne’e kontinua reabilita tan estrada iha parte tasi-ibun, ne’e ami senti kontenti, tanba Nítibe maioria aldeia 17 seidauk nahee ásfaltika, maibé fasilita ho ateru, ne’ebé ami-nia esperansa ba futuru bele kontinua ona estrada husi Oénunu mai to’o Citrana,” nia orgullu.
Notísia relevante:PM Xanana husu Autoridade RAEOA reabilita estrada rurál sira tenke ho kualidade
Entretantu, empreza tolu ne’ebé ezekuta mak Lifau Indah Unipesoál Lda sei ezekuta kilometru-ualu, hahú husi Oénunu suku Suni-Ufe to’o aldeia Bona suku Usitaku, empreza Raynaldos Unipesoál Lda sei ezekuta mós kilometru-ualu, kontinua husi aldeia Bona ba to’o Fatuto’o suku Bene-Ufe no empreza Colneno Unipesoál Lda sei ezekuta kilometru-7,5 kontinua husi Fatuto’o ba to’o Bitila Citrana suku Bene-Ufe.
Jornalista: Abílio Elo Nini
Editór: Rafael Ximenes de A. Belo
