OEKUSI, 09 Abríl 2025 (TATOLI) – Prezidente Konsellu Administrasaun Fundu Infraestrutura (KAFI), atuál Prezidente Autoridade Rejiaun Administrativa Espesiál Oekusi Ambeno (RAEOA) orienta empreza sira-ne’ebé atu halo realibitasaun estrada rurál sira iha suku no aldeia tenke nahe ho simentu no kompleta ho bee-dalan.
Rogério Lobato, hato’o nia rekomendasaun bainhira hala’o fiskalizasaun ba projetu reabilitasaun sira iha sub-rejiaun Oésilo Pássabe foin lalais ne’e, atu kumpre rekomendasaun husi Primeiru-Ministru, Kay Rala Xanana Gusmão, ne’ebé antes ne’e observa aterru estrada rurál sira iha Nítibe ladun iha kualidade.
Notísia relevante:PA RAEOA nota reabilitasaun estrada rurál iha Oésilo-Pássabe laiha kualidade
“Ita hahú halo aterru tanba aterru ne’e hanesan solusaun tranzitória de’it, tan ne’e mezmu tempu halo aterru atu hanoin ona ba oin tau aspaltika, maibé iha parte área rurál movimentu ladun bo’ot, nune’e tenke tau uluk mak simentu, maibé tenke halo ho di’ak kompleta ho bee dalan,” dehan Rogério Lobato iha Oekusi, foin lalais.
Antes ne’e, iha loron 19 Fevereiru 2025, Primeiru-Ministru, Kay Rala Xanana Gusmão, hala’o observasaun ba progresu servisu projetu reabilitasaun estrada rurál rua iha sub-rejiaun Pante Makasar liga ba sub-rejiaun Nítibe nota katak, iha reabilitasaun estrada uza de’it rai henek no rai, nune’e bele hetan estragu hamosu rai rahun iha tempu bailoron no tempu udan hamosu rai rai tahu.
Tanba ne’e, Xefe Governu propoin ba Prezidente Autoridade RAEOA no Diresaun Rejionál Infraestrura (DRI) atu orienta empreza sira-ne’ebé halo reabilitasaun estrada rurál sira, aumenta fui simentu ho rabat beton.
Notísia relevante: KAFI Oekusi aprova projetu emerjénsia 26 ho kustu millaun $36-resin
“Ha’u haree ona estrada sira-ne’e, ha’u sei dehan ba Prezidente Autoridade katak, udan nafatin sei estraga hotu, iha bailoron tiha rai rahun suar, tanba ne’e ha’u sei propoin atu tau simentu, tanba imi (komunidade) iha ne’e karreta ladún barak la’o ba mai, ne’ebé laiha problema,” dehan PM Xanana sede suku Taiboko.
Dokumentu ofisiál ne’ebé Ajénsia TATOLI,I.P asesu iha Diresaun Rejionál Infraestrutura (DRI) katak, KAFI dahuluk implementa iha Okeusi iha projetu hamutuk tolu (3), KAFI daruak ezekuta projetu ualu (8) kompostu projetu lima kona-ba reabilitasaun estrada rurál sira, ponte rua no gabiun ida.
KAFI datoluk iha projetu 27 komposta husi reabilitasaun estrada rurál sia 10 kabe ba sub-rejiaun haat, morru protesaun hamutuk 14 no konstrusaun edifisíu tolu hanesan eskuadra Pássabe, sede suku Costa no kapela Santa Reliqui Citrana ho montante orsamentu $ millaun $37,777,469.45.
Notísia relevante:PM Xanana rekomenda ba empreza kontinua fui semente ba estrada Taibako-Usitaku no Lelaufe
Jornalista: Abílio Elo Nini
Editór: Florencio Miranda Ximenes
