VIKEKE, 10 Jullu 2025 (TATOLI)—Vise-Ministra Finansa (MF), Felícia Claudinanda Cruz Carvalho enkoraja funsionáriu sira iha Munisípiu Vikeke mantein dedika aan servisu ho fuan no domin iha servisu fatin.
“Iha komemorasaun Loron Funsaun Públika ba dala-11 ne’e ha’u husu ba funsionáriu públiku sira iha Munisípiu Vikeke mantein dedika aan halo servisu ho fuan no domin. Tanba funsionáriu sira-ne’e mak makína Estadu nian, funsionáriu sira-ne’e sai ezemplár no sai modelu ba joven sira,” Vise-Ministra Finansa ba jornalista sira iha kampu futeból, Postu Vikeke Vila kinta ne’e.
Governante ne’e aprofunda, funsionáriu sira iha dezempeñu servisu di’ak, maibé dalaruma direjente sira ladún rekoñese, tan ne’e kada diresaun sira nafatin oferese formasaun ba funsionáriu sira hodi eleva sira-nia koñesimentu tanba funsionáriu sira mak sai hanesan forsa ba instituisaun idak-idak.
Aleinde ne’e, Felícia dehan, serimónia finál ba komemorasun Loron Funsaun Públika ne’ebé sei monu iha loron 15 fulan-Jullu ne’e sei partisipa husi Primeiru-Ministru (PM), Kay Rala Xanana Gusmão inklui membru Governu balun.
Entretantu, Prezidente Autoridade Munisipál Vikeke, Francisco C. S de Gonzaga Soares informa katak kona-ba selebrasaun Loron Funsaun Públika (FP) ba dala-11 ne’ebé komemora iha Vikeke funsionáriu sira bele partisipa, maibé oras servisu tenke tama servisu.
“Selerabra Loron Funsaun Públika ne’e nu’udár loron funsionáriu sira-nian, maibé loron ne’ebé servisu tenke tama servisu hanesan baibain. Laiha feriadu. Makína Estadu nafatin funsiona atu serbí ita-nia povu,” nia tenik.
Partisipa iha eventu komemorasaun Loron FP ba dala-11 ne’e husi servisu saúde munisipál, servisu agrikultura, administrasaun munisípiu, postu, servisu edukasaun, autoridade seguransa no instituisaun sira seluk.
Jornalista: Vitorino Lopez da Costa
Editór: Xisto Freitas da Piedade
