DILI, 14 Jullu 2025 (TATOLI)–Diretór Servisu Edukasaun Munisípiu (SEM) Likisá, Júlio da Silva, rekoñese saladeaula menus tanba númeru estudante sempre aumenta kada tinan.
“Ita iha problema saladeaula tanba númeru estudante dalaruma sa’e maka’as liu, entaun eskola mak tenke halo jestaun oinsá mak bele akumula estudante iha saladeaula ida maibé la signifika estudante hotu-hotu tau iha sala ida,” Diretór informa ba Ajénsia TATOLI, via telefónika, ohin.
Nia dehan, diretór eskola ida mak fahe turnu nune’e estudante hotu bele asesu ensinu aprendizajen hanesan.
“Ezame hanesan eskola ida-ne’ebé mak kualidade di’ak liu ne’e presiza halo jestaun fahe ba turnu rua. Ne’e depende ba eskola sira mak halo para ita bele haree ba kualidade,” nia akresenta.
Notísia relevante : ME sei konstrui saladeaula 42 ba eskola Ensinu Báziku
Tuir Diretór Servisu Edukasaun munisipál, la’ós eskola hotu menus maibé iha eskola balun de’it, hanesan Eskola Ensinu Báziku Sentál (EBC, sigla portugés) sira mak menus, “espera iha lei obrigatóriu reforma ne’e bele solusiona kestaun ne’e.”
Nune’e mós, nota mós katak iha eskola balun iha manorin ne’ebé toma konta ba matéria rua.
“Ita haree ba bolsa kandidatu ne’ebé mak iha mesmu balun menus hela no balun kaer hela matéria rua. Ita hein hela bolsa kandidatu ne’ebé mak agora la’o hela ne’e sira seidauk halo kolokasaun ba faze ida tuir mai ne’e ensinu báziku nia seidauk koloka hotu,” nia katak.
Unidade reforma hatama ona lista sira ba Ministeriu nune’e kolokasaun sira bele subtitui fali ba profesór sira ne’ebé mak tama ona idade reforma.
“Substituisaun ba sira ne’ebé mak moras no idade avansadu sira. Iha ona desizaun husi funsaun públika katak reformadu ona, ida-ne’e hakarak ka lakoi ministériu edukasaun tenke substitui ba sira para vaga ne’e labele mamuk. Tanba ita hatene ona lei ne’e aprova ona no tinan 2026 reforma obrigatóriu,” nia tenik.
Jornalista : Osória Marques
Editora : Julia Chatarina
