OEKUSI, 14 Jullu 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato, indika salaun Institutu Apoia Dezenvolvimentu Emprezariál (IADE) sai fatin ba destakamentu funsionáriu husi Autoridade Inspesaun no Fiskalizasaun ba Atividade Ekonómika, Sanitária no Alimentár Institutu Públiku (AIFAESA,I.P) iha Oekusi.
Notísia relevante:AIFAESA koordena autoridade no operadór ekonómiku atu destaka funsionáriu iha Oekusi
Rogério Lobato, informa, antes ne’e, Autoridade simu ona pedidu husi AIFAESA,I.P, husu atu apoia hela fatin provizória, nune’e funsionáriu sira-ne’ebé destaka iha Oekusi, bele hala’o atividade inspesaun no fiskalizasaun ba produtu no la’ós produtu iha Oekusi.
“RAEOA prontu kolabora, hodi kria kondisaun ba AIFAESA atu bele hala’o serbisu ho profisionálizmu no legalidade, entaun aban ita asina protokolu operasaun, entaun fatin ne’ebé ohin ba haree ona iha salaun IADE, imi bele uza ba, ne’ebé ha’u agradese tanba ekipa husi IADE bele koopera ho Autoridade RAEOA hodi fó fatin ba AIFAESA atu hala’o nia serbisu, fatin ne’e kompleta kedas ho haris-fatin, AC no iha mós armazen, maibé falta mobiliáriu; meza no kadeira, ne’ebé aban, ha’u sei orienta lojístika sira atu kompleta fatin ne’e, nune’e aban no bainrua imi bele uza ona atu halo serbisu,” Rogério Lobato, dehan iha Oekusi, hafoin ba observa fatin iha lorokraik ne’e.
Rogério Lobato, hateten, fatin ne’e sei provizória hela, tanba daudaun ne’e ekipa husi terra no propriedade sei identifika fatin, atu halo reabilitasaun, nune’e bele entrega ba AIFAESA.
“Ha’u ko’alia ho Sekretáriu Rejionál Terra Propriedade, atu buka fatin ida bo’ot uitoan, atu ami bele reabilita, atu uza fatin ne’e sai hanesan imi-nia sede rejionál, tanba imi sei halo fiskalizasaun no prende mós sasán entaun, tenki iha fatin luan no bo’ot, tanba imi mós sei kontribui taxa ba kofre Estadu, entaun ha’u senti uza lai salaun IADE ne’e hodi fatin ne’ebé sei buka hela,” nia dehan.
Inspetora AIFAESA,I.P, Odete Viegas da Silva, informa, agradese tanba hafoin hala’o enkontru koordenasaun atu destaka funsionáriu AIFAESA, iha Oekusi, Autoridade RAEOA bele disponibiliza fatin.
“Ha’u agradese ho disponibiliza Autoridade RAEOA tanba bele fó ona fatin ba AIFAESA atu bele hala’o nia serbisu no destakamentu pesoál ka funsionáriu iha Oekusi, tanba dezafíu ne’ebé ami infrenta durante ne’e, mak ami aprezenta ona Prezente Autoridade katak, fatin ba ami atu utiliza hanesan ofisina ba iha ba ami-nia fusionáriu sira, mak semana kotuk ami hato’o ona atu providénsia fatin ba ami, ne’e agradese tanba ohin bele responde ona,” nia orgullu.
Tuir nia, AIFAESA nia servisu iha terrenu, hala’o fiskalizasaun no Inspesaun, funsionáriu sira prende sasán ne’ebé operadór sira komete hanesan faan produtu sira-ne’ebé espiradu, no produtu ne’ebé estragadu, sei rekolla, maibé depoisde rekolla tiha, produtu sira-ne’e presiza fatin.
Notísia relevante:Tempu badak, AIFAESA sei halo nspesaun ba hahan faan iha dalan-ninin
Purtantu, fatin ne’ebé presiza mak ida ba ofisina no ida atu sai hanesan armazein, atu-bele tau produtu ne’ebé prende ona ne’e, normálmente karik iha Dili produtu sira-ne’e, sempre halo destroisaun kada semana, maibé iha Oekusi sei halo kada fulan dala ida, entaun produtu sira-ne’e, produtu oioin hanesan produtu ai-han no produtu la’os ai-han.
Notísia relevante:Abríl-Juñu, AIFAESA halo inspesaun ba operadór ekonómiku hamutuk 826
Jornalista: Abílio Elo Nini
Editór: Rafael Ximenes de A. Belo
