DILI, 14 Jullu 2025 (TATOLI) – Komisaun B iha Parlamentu Nasionál ne’ebé trata Asuntu Negósiu Estranjeiru, Defeza no Seguransa hola parte iha komisaun fiskalizasaun no monitorizasaun ba rekrutamentu membru foun Polísia Nasionál Timor-Leste (PNTL).
Ministru Interiór, Francisco da Costa Guterres, husu Komisaun atu prepara nia ema atu hola parte iha komisaun referida.
“Komisaun fiskalizasaun no monitorizasaun bele ba haree prosesu rekrutamentu ne’e la’o ho transparénsia, no tuir pradraun ne’ebé iha, hodi bele hetan ema ne’ebé kualidade hodi tuir formasaun polisiál”, ministru hateten hafoin audiénsia ho Komisaun B, iha Parlamentu.
Governante ne’e salienta katak hafoin publikasaun Jornál Repúblika ba diploma ministeriál sei forma ekipa júri ba rekrutamentu no komisaun fiskalizasaun no monitorizasaun.
“Iha Agostu no Jullu tinan ne’e [komisaun júri rekrutamentu] komesa ona serbisu, depois sira mak sei determina data [fiksu], bainhira mak atu loke prosesu rekrutamentu ne’e ba públiku”, nia adianta.
Prezidente Komisaun B, Domingos Augosto ‘Deker’, hateten komisaun simu ona pedidu husi Ministériu Interiór hodi hola parte iha komisaun ba rekrutamentu membru PNTL foun.
Tuir Nia, rekrutamentu ba membru PNTL foun iha duni nesesidade tanba tuir fiskalizasaun komisaun nian iha territóriu presiza aumenta númeru PNTL.
Notísia relevante: Komandu altera kritéria ba partisipasaun feto iha rekrutamentu PNTL
Jornalista: Nelson de Sousa
Editora: Maria Auxiliadora
