OEKUSI, 17 Jullu 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), lideradu Rogério Tiago de Fátima Lobato, promete sei aloka rihun $20 ba Asosiasaun Feto Mudansa Ekonomia Família (AFMEF) atu kontinua dezenvolve produtu Tais iha Oekusi.
“Oras ne’e ita prepara atu halo sertifikasaun ba aeroportu Rota do Sândallo. Ha’u sei fó fatin ida ba grupu AFMEF atu tau Tais iha aeroportu laran, ne’e para bainaka sira mai husi Dili ka nasaun seluk, molok tama mai Oekusi, iha aeroportu ita tenke haruka sira hola Tais Oekusi, ne’ebé prodús rasik husi inan-feto sira, ne’ebé Autoridade sei aloka fundu uitoan, atu finansia ba suku hotu-hotu atu dezenvolve tais Oekusi ne’e, nu’udar identidade orijinál,” Dehan Rogério Lobato, iha Oekusi.
Imajen TATOLI/Abílio Elo Nini
Notísia relevante:Dezenvolve ekonomia família, AFMEF eleva abilidade grupu feto iha Oekusi
Nia informa, ekipa sei hadi’a no forma didi’ak, atu integra hotu suku 20 sira-nia motif Tais, nune’e fasíl ba vizitante sira atu eskolla, la’ós tau de’it suku ida ka rua nian, maibé suku hotu-hotu nia Tais tenke partisipa hotu.
“Osan hira mak imi presiza tanba Oekusi mós iha fundu sosiedade sívil, tenki halo proposta ida di’ak, klaru, tanba ne’e osan Estadu nian. Autoridade tenke apoia imi-nia inisiativa tanba ne’e kultura Oekusi nian, ita tenke promove, ne’ebé imi hakarak hira, ha’u hanoin rihun $20, imi bele hahú ho ida-ne’e, depois mak ita sei observa imi-nia progresu la’o ba oin ne’e oinsá, mak ita bele apoia tan liuhusi ne’e,” nia promete.
Iha biban, Diretora AFMEF, Joana Bobo Tanu, agradese no promete sei submete pedidu ofisiál ida, tanba tuir planu, AFMEF sei dezenvolve tan grupu produsaun Tais ba suku 20 iha Oekusi.
“Osan rihun $20 ne’e, ami promete sei alarga tan ba grupu feto iha suku 20 iha Oekusi, tanba daudaun ne’e iha ona grupu hitu iha suku hitu, atu apoia sira, nu’udar fundu rotativu, ho durasaun kada tinan rua, osan inan bele fó fila Estadu no osan funan uza ba gurpu nia nesesidade,” nia dehan.
Notísia relevante:AFMEF oferese fundu rotativa rihun $83 hasa’e kreatividade grupu feto 35 iha Oé-Cusse
Lembra katak AFMEF eziste iha Oekusi iha 2019 hala’o kna’ar ho voluntarimente, to’o 2021 AFMEF hetan apoia fundu husi Sekretária Estadu Igualdade no Inkluzaun (SEII) konsege harii grupu feto 34, kontinua ba to’o 2023 no 2024 harii tan grupu feto 35, iha 2025 ne’e AFMEF hetan apoia fundu husi Gabinete Apoia Sosiedade Sívil (GASC) hodi harii tan grupu feto hamutuk hitu iha suku hitu hanesan Suku Bobometo, Bobokase, Naimeko, Nipani, Costa, Lifau Lalisuk,” nia dehan.
Notísia relevante:RAEOA-AFMEF selebra kontratu dezenvolve grupu feto 34
Jornalista: Abílio Elo Nini
Editór: Rafael Ximenes de A. Belo
