DILI, 17 Jullu 2025 (TATOLI)—Prezidente Federasaun Atletismu Timor-Leste (FATL), Áfranio Xavier, husu atleta timoroan husi modalidade atletismu nain-12 atu kaer metin espíritu desportivu bainhira kompete iha jogu desportivu CPLP edisaun ba da-12.
Notísia Relevante: Atleta 52 sei kompete iha modalidade atletizmu jogu desportivu CPLP
Nia husu atleta sira tenke dixiplina atu kompete ho kompetitivu kaer nafatin espíritu desportu, respeita malu tuir tema ba jogu despostiva CPLP mak “Somos Um”, nune’e tenke kompete ho espíritu ne’ebé mak moos hodi fo benifísiu ba nasaun Timor-Leste.
“Maske ita-nia atleta sira-ne’e otas nurak hotu de’it no tenke prepara mentalidade para hasoru atleta sira seluk, labele tauk, entaun kalan-kalan ita sempre orienta sira prepara-an hodi loron tuir kompetisaun ho di’ak,” Prezidente federasaun ne’e informa ba Agência Tatoli iha nia kna’ar fatin, GMT, Dili, ohin.
Tanba, nia dehan, ekipa portugál atleta ho idade-16 ne’e nia kualifikadu iha, Áfrika parte Angola mós iha haree kuaze atleta avansadu barak, satán atleta husi Mosambike tanba sira iha atleta naran ne’ebé sai manán-nain ba kompetisaun olimpiade, entaun TL labele konsidera sira fraku, maibé prepara atleta sira hodi kompete ho sira.
Maske Timor-Leste iha atleta potensiál feto ida ho naran Doneita Fátima Amaral Xavier, ne’ebé kompete ona iha nivél internasionál hanesan kompetisaun atletizmu ho korrida metro 1500 iha Indonézia Opening Jogjakarta, nia konsege sai manán-nain datoluk (3°lugar), aleinde ne’e nia mós ba kompete tan iha Malázia maibé la konsege manán.
“Enkuantu ita-nia atleta sira-ne’e maiória mak seidauk kompete iha nivél nasionál tantu internasionál, maibé ita nafatin fó preparasaun treinu ba sira liuhusi prátika tékniku tátiku no estratéjia ba atleta sira, oinsá bele ultrapasa ho situasaun ida-ne’e,” nia dehan.
Nia konsidera, tanba lakon ka manán ne’e desizaun husi atleta sira-nia esforsu, maibé FATL nafatin iha planu hodi fó oportunidade ba sira kompete mós iha nivél internasionál.
Lista naran atleta modalidade atletizmu Timor-Leste mak hanesan Jovenia Soares Pinto, Doneita Fátima Amaral Xavier, Juviana da Costa dos Reis, Alisa Miranda Pereira, Candra da Conceição Soares, Chelcia Soares Babo, Castro Amaral Belo Trindade, Veldenizio Correia de Jesus, Julio de Fátima Amaral, Pascoal de Jesus Exposto, Franguino Barros Brites no Carlos S. de Oliveira.
Jornalista : Alexandra da Costa
Editor : Cancio Ximenes
