DILI, 17 Jullu 2025 (TATOLI)—Prezidente Federasaun Atletismu Timor-Leste (FTA), Áfranio Xavier, informa atleta 52 husi nasaun Comunidade dos Países da Língua Portuguêsa (CPLP) hitu (7) hanesan Angola, Portugál, Mosambike, Guiné-Bissau, São Tome e Prinsipe, Kabo Verde inklui Timor-Leste mak sei kompete iha modalidade atletizmu.
Notísia Relevante: Preparativu Atletizmu másimu ona hodi enfrenta jogu desportivu CPLP
Jogu desportivu CPLP ne’e husi inísiu komisaun organizadora fó kuota ba federasaun atletizmu Timor-Leste ho kategória idade 16 to’o 17, entaun sira prepara feto neen (6) no mane neen (6) ho totál hamutuk 12.
“Husi atleta sira-ne’e ita la’ós indika de’it hodi kompete ne’e lae, tamba sira-ne’e liuhusi kampionatu selesaun nasionál no ita hili husi manán-nain husi kategória A,” Prezidente ne’e informa ba Agência Tatoli iha nia kna’ar fatin, Gedung Matahari Terbit (GMT), ohin.
Atleta na’in-12 ne’e, federasaun hili husi munisípiu Manatutu feto ida (1) no mane ida (1), Bobonaru feto ida (1), Dili feto ida (1) no restu ne’e husi Ermera.
Modalidade atletizmu ba atleta sira atu kompete ne’e fahe ba klase hitu (7), enkuantu atleta feto inklui mane sei kompete iha klase ne’ebé hanesan no klase sira mak hanesan tuir mai ne’e; korida metru 100, metru 200, metru 3000, metru 1500, metru 4×100, lansamentu pesu (tuda todan) no saltu kumprimentu
“Atleta sira, ita distribui tiha ona dalaruma atleta ida-nia bele kompete iha klase rua, atleta rua bele kompete iha klase ida no bele mós kompete ih klase tolu, tanba ne’e ita uza regra husi atletizmu nian,” nia esplika.
Husi klase hitu (7) ne’e sei fahe ba faze rua, ida finál no ida seluk mak eliminasaun, entaun iha faze eliminasaun só akontese iha korida metro 100 no metro 200 de’it, maibé barak liu mak faze finál.
Jornalista : Alexandra da Costa
Editór : Cancio Ximenes
