DILI, 30 Jullu 2025 (TATOLI)—Governu liuhusi reuniaun Konsellu Ministru aprova projetu Rezolusaun Governu kona-ba definisaun kompozisaun komité revizaun polítiku ba Orsamentu Jerál Estadu (OJE) ba tinan 2026, ne’ebé aprezenta husi Vise-Ministra Finansa, Felícia Claudinanda Cruz Carvalho, no sei aprezenta ba Parlamentu Nasionál.
“Ne’ebé Governu to’o agora servisu hela ba preparasaun orsamentu no tama ona ba tenpu atu aprezenta orsamentu tinan foin (2026) nian,” Ministru Prezidénsia Konsellu Ministru, Agio Pereira, informa ba jornalista sira iha Palásiu Governu.
Tanba ne’e, nia dehan, ohin define kompozisaun komité revizaun polítika orsamentu, ne’ebé Primeiru Ministru mak sei prezide hamutuk Vise Primeiru-Ministru na’in-rua (2) no ministériu seluk hanesanMinistériu Finansasne’ebé sei fó apoiu lojístiku no sekretariadu inklui organizasaun seluk hanesan Komisaun Funsaun Públika.
Enkuantu bazeia ba dokumentu ofisiál ne’ebé Agência Tatoli asesu katak, komité Revizaun Polítiku iha objetivu atu garante katak planu anuál husi servisu no entidade Setór Públiku Administrativu viavel no aliñadu ho prioridade nasionál ne’ebé estabelese iha Planu Estratéjiku Dezenvolvimentu tinan 2011-2030.
Nune’e, iha Programa Governu, iha planu tempu médiu no dokumentu estratéjiku sira seluk. Komité mós iha responsabilidade atu asegura katak dotasaun orsamentál ne’ebé atribui tuir planu hirak ne’e no limite másimu ba despeza ne’ebé define ona, no mós garante katak inkluzaun dotasaun iha Orsamentu Jerál Estadu depende ba inskrisaun prévia husi ninia atividade iha planu servisu anuál ka entidade sira-ne’e.
Komité Revizaun Polítiku ne’e sei prezide husi Primeiru-Ministru no kompostu mós hosi Vise-Primeiru-Ministru rua, Ministra Finansas, Ministru Obras Públikas no Ministru Planeamentu no Investimentu Estratéjiku, Sekretáriu Estadu Igualdade, Prezidente Komisaun Funsaun Públika, Prezidente Institutu ba Defeza Direitu Labarik, reprezentante ida hosi Asosiasaun Defisiente Timor-Leste mós sei partisipa iha sorumutu Komité Revizaun Polítiku nu’udar observadór.
Jornalista : Alexandra da Costa
Editór : Cancio Ximenes
