VIKEKE, 01 Agustu 2025 (TATOLI)—Xefe Suku Maluru, Postu Administrativu Vikeke Vila, Munisipiu Vikeke, Bendito Soares hateten tinan 2025 Programa Nasionál Dezenvolvimentu Suku (PNDS) Suku Maluru Beaço seidauk implementadu tanba sei hein orientasaun husi Governu sentrál.
“Iha tinan 2025 implementasaun PNDS ami Suku Maluru fó prioridade ba konstrusaun morru protesaun ba Ensinu Báziku Sentrál (EBC-sigla portugeza) Komandante Rosito Beaço. Ami atu loke ona kuotasaun, maibé diretór PNDS munisípiu dehan ba ami hein lai tanba seidauk iha orietasaun husi Governu. Nune’e, ha’u dehan ba sira katak iha orietasuan ne’e mak orsamentu PNDS ba tinan 2025 tama iha konta Suku Maluru nian,” Bendito Soares ba TATOLI iha Suku Maluru, Sesta ne’e.
Nia dehan problema ne’e nia aprezenta ona Prezidente Autoridade Munisípiu Vikeke no diretór PNDS munisípiu hodi haree.
Bendito esplika katak kauza suspensaun ba dezenvolvimentu iha Suku Maluru mak programa LNG ne’ebé atu dada mai iha área Beaço nian, tanba ne’e mak impede prosesu dezenvolvimentu sira tama iha suku Maluru.
“Problema ida-ne’e sai hanesan preokupasaun ba ami-nia komunidade iha Suku Maluru tanba ami sai vítima ba dezenvolvimentu. Governu presiza klarifika ba ami katak LNG tau duni iha Beaço ka muda ona ba Natarbora, atu ami bele hatene no bele implementa dezenvolvimentu iha ami-nia suku,” nia hato’o.
Tuir alokasaun orsamentu PNDS 2025 ba Suku Maluru hamutuk $23.000.00 hodi konstrui morru protesaun ba eskola.
Hatán ba preokupasaun ne’e, Diretór Servisu Programa Nasionál Dezenvolvimentu Suku (PNDS) Munisípiu Vikeke, Fransisco Soares Varela haktuir kona-ba problema Suku Maluru ne’ebé seiduak implementa obra PNDS ba tinan 2025 ne’e problema nasionál.
“Ne’e problema nasionál. Ha’u relata ona ba Komisaun E Parlamentu Nasionál no relata ona ba Ministériu Adiministrasuan Estatál (MAE) atu rezolve ida-ne’e. MAE no Ministériu Petróliu no Minerál mak bele fó solusaun. Ami hato’o hotu ona ba sira. Bainhira sira fó despaxu ruma ba ita mak foin ita implementa,” nia hato’o.
Jornalista: Vitorino Lopez da Costa
Editór : Xisto Freitas da Piedade
