AINARU, 11 Agostu 2025 (TATOLI)–Ospitál Referál Maubisse, hahú husi fulan-Janeiru to’o Agustu tinan 2025, rejista bebé ne’ebé moris hamutuk na’in-522 ne’ebé kompostu husi partu normál hamutuk 313, Vakum (partu prolongadu) na’in-23, óbitu fetál (bebé mate iha kabun laran) na’in-22 no operasaun Cesariana hamutuk na’in-164.
Notísia Relevante: Mákina hasai raan iha Ospitál Referál Maubisse avaria
“Iha Janeiru to’o mai iha Agustu 522, ida-ne’e mak dadus husi inan sira-ne’ebé partu iha ospitál referál Maubisse. Ida-ne’e la’ós de’it husi postu-administrativu Maubisse maibé husi mós munisípiu tolu hanesan Aileu inklui Kovalima,” Xefe Departamentu Ginekolójia no Obstétriku iha Ospitál Referál Maubisse, Luizinha da Costa, informa ba jornalista sira iha nia kna’ar fatin, Maubisse, ohin.
Husi númeru ne’e, nai dehan, laiha inan ida mak mate ka lakon vida maibé sira deteta iha inan ida mak ho idade menoridade.
“Ida óbitu fetál ne’e katak bebé ida-ne’ebé mak inan isin-rua sira mai konsulta ne’e bebé mate tiha ona iha kabun laran. Entaun, inan sira-ne’ebé mak partu labele, médiku sira iha alternativu seluk mak uza mákina atu ajuda inan sira hodi partu,” nia esplika.
Nia hatutan, iha inan isin-rua balun mak atu partu maibé bee-manas fakar liu tiha ona oras rua nia larab, entaun pesoál saúde sira salva bebé ne’e atu moris lalais ho ventonsa (mákina dada sai bebé), nune’e bele tulun dada sai bebé ne’e. Kona ba bebé sira-ne’e mak kondisaun permatur ne’e la barak, maibé ida-ne’e kuazé na’in-20 ida hanesan ne’e maibé labarik barak mak moris ho kondisaun normál.
“Tanba, fasilidade ba maternidade iha ospitál referál Maubisse sufisiente hela. Kona-ba ai-moruk sira hanesan ohin ami-nia diretóra apoiu mós ko’alia ona, hanesan ai-moruk menus sira halo pedidu urjente entaun ai-moruk mai hela,” nia informa.
Aleinde ne’e, Ospitál Referál Maubisse mós rejista kazu moras afetadu aas liu mak moras vias respirasaun (pernapasan) aguda (IRA), tanba moras ida-ne’e resjistu kada loron ida bele to’o 58 tanba afeta husi sigaru nia su’ar no mós ahi nia su’ar.
Entretantu, totál Profisionál saúde iha Departamentu maternidade Ospitál Referál Maubisse hamutuk na’in-15, ne’ebé kompostu husi kontratadu na’in-haat (4) no funsionáriu permanente hamutuk na’in-11.
Notísia Relevante: Komisaun F rekomenda MS reforsa médiku internista iha ospitál referál Maubisse
Jornalista : Alexandra da Costa
Editór : Cancio Ximenes
