DILI, 21 Agostu 2025 (TATOLI)–Diresaun Nasionál Transporte Terrestre (DNTT) seidauk halo rejistu foun ba transporte públiku hanesan mikrolete husi inísiu fulan-Janeiru to’o fulan-Agostu tinan 2025, tanba atu moderniza transporte públiku.
Notísia Relevante: MTK agradese BAD nia apoiu ba dezenvolvimentu setór transporte iha Timor-Leste
“Ami seidauk rejistu veíkulu ba mikrolete foun husi tinan 2023 to’o agora tanba planu atu halo modernizasaun transporte públiku,” Xefe Departamentu Rejistu Veíkulu, Marcelina Janice Dias Beloi, hateten ba Agêcsia Tatoli iha nia kna’ar fatin DNTT, Balide, ohin.
Governu sei implementa bus hodi halo operasaun sirkulár iha sidade Dili no sei taka sirkulár iha área operasaun (jalur) balun ba mikrolet 09 no 010 hodi fó oportunidade ba bus atu kontinua halo operasaun.
“Antes ne’e mós dirijente Ministéria Transporte Komunikasaun halo enkontru ona ho jestór mikrolete sira, no lolos ne’e atu implementa iha tinan ida-ne’e maibé seidauk tanba jestór sira seidauk iha posibilidade hakarak. Ida-ne’e la’ós taka bemo ho marka rua ne’e atu halo operasaun, ne’e lae, maibé kontinua halo operasaun no sei muda mak área sirkulár,” nia dehan.
Nia konsidera, tanba Timor-Leste independénsia ona, entaun presiza moderniza transporte públiku, nune’e Timor-Leste labele kontinua ho kondisaun hanesan ne’e.
Diresaun Nasionál Transporte Terrestre rejistu transporte mikrolete ne’ebe la ativu hamutuk 186, signifika kareta nia kondisaun mak ladi’ak no dalaruma sira mós la mai halo renova karta lisensa durante tinan naruk nia laran,
“Tanba Diresaun Nasionál Transporte Terrestre iha ninia kritéria katak karreta ne’ebé lahalo renovasaun husi tinan 2022 ba kraik, entaun DNTT sei la fó oportunidade hodi halo renovasaun, maibé husi tinan 2023 ba leten sira nafatin trata renovasaun ba transporte,” nia informa.
Enkuantu, mikrolet ne’ebé lahalo renovasaun maibé kontinua halo operasaun sirkulár iha Dili laran, ne’e sei hetan sansaun selu infrasaun husi Polísia Tránzitu Seguransa no Rodoviária tanba sira iha koordenasaun ba malu hodi deteta mikrolete sira liuhusi passa revista (cek point).
Kritéria trata veíkulu foun ba mikrolete
Jestór mikrolet tenke halo karta pedidu atu halo operasaun iha área ne’ebé no karta pedidu sei hetan despaixu husi Diretora Diresaun Nasionál Transporte Terrestre, hafoin lori ba trata karta lisensa iha SERVE, I.P no prosesu tuir mai mak halo inspesaun ba karreta nia kondisaun. Bainhira durante prosesu inspesaun deteta kondisaun di’ak entaun mikrolete ne’e sei hahú halo ona opersaun.
Aleinde ne’e DNTT mós destaka ninia ekipa na’in-sia (9) hodi halo kontrola operasaun mikrolete sira iha terminál Bekora, Taibessi no iha Manleuana, kada terminál destaka ema na’in-tolu (3).
Totál transporte mikrolete ne’ebé ativu hamutuk 862 ne’ebé kompostu husi mikrolete 01 hamutuk 74, mikrolete 02 hamutuk 65, mikrolete 03 hamutuk 75, mikrolete 04 hamutuk 38, mikrolete 05 hamutuk 78, mikrolete 06 hamutuk 55, mikrolete 07 hamutuk 40, mikrolete 08 hamutuk 28, mikrolete 09 hamutuk 59, mikrolete 010 hamutuk 204, mikrolete 011 hamutuk 75, mikrolete 012 hamutuk 17 no mikrolete 013 hamutuk 54.
Área sirkulár (rute) mikrolete 01 to’o 013
Mikrolete 01 halo sirkulár husi terminál Bekora, Kuluhun, Merkadu Lama, Audian fila-fali ba terminál Bekora.
Mikrolete 02 halo operasaun husi terminál Becora, Kuluhun, Bidau Akadiruhun, Paulus, Lecidere Eis KODIM, Acait, Hallo Mister, Merkadu Lama, Audian, Ailelehun, Kuluhun, finál iha terminál Camea (5 Km).
Mikrolete 03 sei halo operasaun husi Merkadu Manleuana, Escola São José has Laran, Delta, Timor Plaza, CCF Komoro, Fatuhada, Palásiu Prezidente, Mandarin, Hotél Timor, Bidau Akañkadiruhun, Tugu Pramuka, Palacio Presidente, Finál iha Merkadu Manleuana.
Mikrolete 04 sei halo operasaun husi terminál Taibessi, China Rate, Lahane, Balide, Matadoru, Vila Verde Katedral, Tugu Pramuka, Mandarin, Lecidere, Bidau Toko Baru, Akadiruhun, Bairo Formosa, Merkadu Lama, Balide Lahane, Finál iha terminál Taibessi.
Mikrolete 05 halo operasaun husi terminál Taibessi, China Rate, Balide, Matadoru, Vila Verde Katedral, Bebora, Bairo Pite, Fatumeta, Manleuana, Bua Laran, (10 Km). Manleuana, Fatumeta, Bairo Pite Bebora, Kolmera, Kaikoli, Merkadu Lama, Balide Final iha terminál Taibessi.
Mikrolete 06 halo operasaun husi Delta, Hudi Laran, Bairu Pitte, Bebora, Mandarin, Kolmera, Kaikoli, Merkadu Lama, Audian, Formoza, diresaun UNTL sentrál, Vila Verde, Bairu Pitte, Fatumeta, Hudi Laran, Aimutin, finál Delta.
Mikrolete 07 halo operasaun husi terminál Taibessi, China Rate, Pertigaan Lahane, Balide, Audian Kampo Demokrásia, Ex. Kantor Bina Marga, Katedrál, Bebora Perumnas, Bairo Pite, Ailok Laran (6 Km), Ailok Laran Perumnas, Bairo Pite, Bebora, Tugu Pramuka, Mandarin Kolmera, Kaikoli, Lama Merkadu Lama, Balide, finál iha terminál Taibessi.
Mikrolete 08 halo operasaun husi terminál Taibessi, China Rate, Pertigaan Lahane, Hospital Leten, Pertigaan Lahane, DNTT, Matadouro, Untl Lama, Merkadu Lama, Balide, China Rate, Bekusi, Escola STM Becora, finál iha terminál Taibessi.
Mikrolete 09 halo operasaun husi Kampung Baru, rotunda Komoro Ponte Komoro, Bebonuk, Pertamina, Eis KODIM, Akait, Palásiu Governu oin, Merkadu Lama, Balide, Matadoru, Vika Verde Katedrál, Mandarin, Faról, Pertamina, Bebonuk, Ponte Komoro, rotunda Komoro, finál iha Kampung Baru.
Mikroleet 010 halo operasaun husi terminál Tasi-Tolu, rotunda Komoro, Ponte Komoro, Merkadu Komoro, Fatuhada Heliport, Mandarin, Mahkota, Eis KODIM Lecidere. Santa-ana. Toko Baru (10 Km) Akadiruhun, Kampo Demokrásia, Vila Verde Katedrál, Mandarin, Palásiu Prezidente, Fatuhada, Merkadu Komoro, finál iha terminál Tasi-Tolu.
Mikrolete 011 halo operasaun husi terminál Tasi-tolu, Komoro, Kruzamentu Aimeti Laran, Rua Has Laran, Merkadu Manleuana, Fomentu Kampus IOB, Kruzamentu Leader, Delta, Cruzamento Elemloi, Rua Hudi Laran, Rua Tasi Tolu (13 Km). Elemloe, Delta, Kruzamentu Leader, Komoro, finál Tasi-Tolu,
Mikrolete 012 halo operasaun husi Kristu-Rei, Metiaut, Ponte Santa-Ana, Repartisaun Suku Bidau Lecidere. Kruzamentu Igreja Bidau Mota-Klaran, Pertamina Bidau, Alfaiate Avong, Kapela Bidau, Lecidere, Kruzamentu Burger King, Xanana Reading Room, Largo Licedere, Novu Turismu, Ponte Santa- Ana, Metiaut, finál Kristu Rei (9 Km).
Mikrolete 013 halo operasaun husi Bebonuk, Pantai Kelapa, Aimutin, Manleu, Ponte foun Komoro no finál iha Bebonuk.
Notísia Relevante: Motorista mikrolete no taksi tenke obedese ba regra hodi uza uniforme
Jornalista : Alexandra da Costa
Editór : Cancio Ximenes
