DILI, 21 Agostu 2025 (TATOLI)—Ministru Juventude Desportu Arte no Kultura (MJDAK), Nelyo Isaac Sarmento, hateten kona-ba oinsá atu tau atensaun ba atleta hirak ne’ebé hatudu prestasaun iha jogu Komunidade Nasaun Sira Ko’alia Lian Portugés (CPLP, sigla portugés) kada federasaun mak tenke tau atensaun.
Notísia Relevante: Governu atribui subsídiu ba atleta Timor-Leste
“Ba atleta sira hatudu prestasaun iha jogu CPLP ne’e, atu fó atensaun ne’e Federasaun sira, sira mak durante ne’e prepara atleta sira-ne’e. Bainhira hatudu ona prestasaun hanesan ne’e, oinsá sira-nia regulár preparasaun, kada loron tenke tau nafatin atensaun ba labarik sira,” Governante ne’e hateten ba jornalista sira iha Edifisiu Ministériu Finansa, foin lalais ne’e.
Nia dehan, bainhira federasaun iha inisiativa di’ak Governu iha obrigasaun atu fó atensaun nune’e bele dezenvolve nafatin atleta sira-nia talentu.
“Klaru katak se sira iha inisiativa fó atensaun, Governu iha inisiativa no obrigasaun atu fó atensaun. Se sira mós nonook hela, Governu atu halo Oinsa. Buat hotu ne’e mai husi sira, depois Governu prontu fó asisténsia,” nia hateten.
Tanba ne’e, nia alerta ba federasaun desportiva sira hotu tenke tau klaru ona regulamentu treinamentu ba atleta sira kada loron hodi prepara ba eventu nasionál no internasionál, atu nune’e evita bainhira eventu ruma besik foin halo preparasaun.
“Se sira ho inisiativa di’ak, Governu bele fó insentivu ba sira. Maibé, sira prepara kondisaun hotu hato’o pedidu mai Governu fó apoiu ba sira,” nia dehan.
Kona-ba oinsá mak atu fó subsidiu ruma ba atleta sira iha prestasaun ne’e, Nelyo esplika, jogu referidu la tama iha kategoria internasionál maibé jogu sub-eskolár.
“CPLP la tama iha kategoria internasionál, jogu ne’e tama iha sub-eskolár. Maibé iha hanoin bainhira atividade hotu ona, ami hato’o relatoriu sira hotu karik iha empreza ruma hakarak apoiu subsidiu ba sira laiha buat ida. Maibé, ida-ne’e ita buka hela dalan no komunika hela ho empreza sira karik posibilidade sira bele fó apoiu ba ita-nia atleta sira hatudu prestasaun ne’e, karik sira hakarak fó hanoin ne’e di’ak liutan,” nia relata.
Atleta Timor-Leste hetan medalla iha jogu CPLP mak hanesan Siera Pinto, atleta taekwondo, manán medalla osan-mean.
Atleta rua seluk, Deofia Barreto no Nélio dos Santos, mós partisipa iha finál kompetisaun taekwondo. Nélio dos Santos mós hetan medalla osan-mutin. Iha xadrez, Timor-Leste hetan medalla bronze tolu.
Iha kompetisaun taekwondo ne’e atleta Timor-Leste, Siera Pinto, hetan medalla osan-mean, Deofia Barreto hetan medalla osan-mean, Nélio dos Santos hetan medalla osan-mutin no atleta Denilton Pereira hetan medalla osan-metan.
Iha xadrez, atleta Timor-Leste hetan medalla bronze tolu (3), medalla osan-mean rua (2), medalla osan-mutin ida (1) no medalla osan-metan hamutuk ida (1).
Notísia Relevante: CDTL kontinua koordena ho Governu fó-atensaun ba atleta Jogu CPLP
Jornalista : Hortencio Sanchez
Editór : Cancio Ximenes
