DILI, 25 Agostu 2025 (TATOLI)—Xefe Sentru Saúde Vera Krús, Marilia Piedade, informa durante lansamentu fatin rastreiru ba tratamentu kankru serviks mai to’o agora rejistu ona inan feton sira hamutuk 757.
Notísia Televante: MS-parseiru lansa fasilidade rastreiu ba tratamentu kankru serviks iha Vera-Krúz
“Ko’alia kona-ba rezisténsia kankru serviks, ita hatene katak ita hetan lansamentu iha loron 27 Marsu 2025, sentru ida-ne’e sai klinika rastreiu ba serviks. Ita-nia dadus husi ne’eba mai to’o agora, ita rejistu inan feton sira hamutuk 757. Husi númeru ne’e, iha na’in-94 mak pozitivu ba Human Papiloni Virus (HPV), tanba virus ne’e mak kauza ba kankru serviks,” Marilia Piedade hateten ba jornalista sira iha nia kna’ar fatin, Vera Krús, ohin.
Nia dehan, Human Papiloni Virus ne’e mak la trata mak tinan 15 ba leten, tan sei hetan kankru serviks, tanba ne’e agradese ba apoiu sira-ne’ebé mai husi MS no sentru saúde Vera Krús mós iha laboratóriu oinsá atu halo teste Genexpert ba ida-ne’e.
”Ita iha mákina teste Genexpert mós iha no pesoál treinadu na’in-rua (2) ne’ebé fornese teste no depois inan feton sira-ne’ebé mak teste sedu nia rezultadu. Tratamentu iha ne’e imediata no balun mós presiza tan hein, depende nia kondisaun tanba inan sira balun servisu entaun importante mak tenke kontaktu sira pozitivu atu fó tratamentu sedu,” nia dehan.
Nia dehan, to’o agora inan sira hamutuk 81 mak hetan ona taratmentu restu seluk sei pendente hela no balun la elijivel ekipa sira haruka ba Hospitál Nasionál Guido Valadares, tanba ekipa sira halo lina koordenasaun servisu ne’ebé mak di’ak entre espesilaista sira, entaun fasil tebes atu transfere pasiente ba ne’eba.
Nia afirma, sira-ne’ebé mak pedente ne’e ekipa sira sei komunika ba inan sira-ne’ebé mak hetan pozitivu husi Human Papiloni Virus no fasil tebes mai iha ne’e hodi hetan tratamentu.
“Ami sei kontaktu hotu ba inan sira-ne’ebé mai halo tratamentu iha ne’e, atu sira bele hatene sira nia estatutu, tanba ida-ne’e hanesan programa ida-ne’ebé inklui ona atu telefone tuir, entaun hafasil atu komunika pasiente sira mai teste iha ne’e,” nia dehan.
Nia haktuir, inan feton sira-ne’ebé mak mai iha klinika rastreiu ba serviks ne’e husi idade 30 to’o 49 sira-ne’e, mai fatin ne’e atu enkaixa programa integradu saude ne’ebé mak halo iha komunidade no pesoál treinadu mós ba iha komunidade nia leet, oinsá sira halo advokasia kona-ba kankru serviks, entaun inan feton sira mai partisipa iha rastreinu ne’e ho maismu tebes.
Notísia Televante: MS halo ona rastreiu ba moras la-hada’et hamutuk ema rihun 20
Jornalista : Felicidade Ximenes
Editór : Cancio Ximenes
