DILI, 08 setembru 2025 (TATOLI)—Ministru Negósiu Estrajeiru no Kooperasaun, Bendito Freitas, hatan kona-ba insidente iha Embaixada Kambódia iha área Markoni iha loron Domingu (07/09), ne’ebé suspeitu sira harahun lampu tolu iha resintu Embaixada ne’e laiha impaktu ba relasaun bilaterál entre Timor-Leste ho Kambódia iha futuru.
“Naturalmente buat hotu sempre iha nia surpreza, kooperasaun bilaterál sempre la’o nafatin, insidente ne’e la’ós insidente polítiku ida, ida-ne’e hanesan buat ida-ne’ebé kauza husi buat ne’ebé dehan inesperadu. Ita la espera katak atu akontese,” Ministru Bendito hato’o hafoin partisipa iha reuniaun estraordinária Konsellu Ministru, iha Palásiu Governu, Segunda ne’e.
Governante ne’e haktuir, asaun sira ne’e mosu tanba joven sira bá tuir festa, depois kalan lanu, no ikus mai tuda sala tiha Embaixada.
“Tuir loloos ne’e labele akontese. Ita iha koordenasaun di’ak tebes ho Governu Kambódia, ne’ebé ita informa ba sira katak ne’e nu’udar insidente ida. Ha’u foin atu rekolla informasaun tanba ha’u moras hela, maibé ba insidente ne’e husi parte seguransa sira responde emediatamente, ne’ebé ita espera katak insidente ne’e labele repete tan,” nia akresenta.
Notísia relevante : PNTL identifika suspeitu harahun lampu Embaixada Kambodia iha Markoni
Nia dehan, Embaixada ne’e nu’udar fatin ba reprezentasaun diplomátiku estranjeiru no territóriu internasionál no tuir loloos sidadaun sira iha konesiénsia atu labele tuda espasu ne’e.
“Ita tenke hatene katak espasu Embaixada ne’e espasu deterritóriu internasionál, tanba kada Embaixada ne’e reprezenta sira-nia país. Tanba ne’e, hafoin akontese tiha insidente ne’e, Prezidente Repúblika vizita kedan, ita-nia serbisu seguransa, liuliu ita-nia Polísia Nasionál Timor-Leste sira mós toma medida sériu tebes. Insidente ne’e submete ona ba investigasaun kle’an depois ita sei relata,” Ministru katak.
Hafoin insidente ne’e, Ministru komunika ona ho parte Embaixadór Kambódia iha Timor-Leste, Chun Sovannarith.
“Ohin dader ha’u mós iha telefone no ko’alia diretamente ho Embaixadór Kambódia iha Timor-Leste, tanba dehan katak ami sente dezpontadu ho insidente ne’e, ne’ebé sei halo investigasaun kle’an,” nia haktuir.
Biban ne’e, Governante ne’e husu ba joven sira atu labele kontinua asaun sira ne’e.
“Ita tenke hanorin ita-nia sidadaun sira, liuliu joven sira ne’e, karik bá festa tenke hatene a’an oituan, bá labele tua lanu depois tuda edifísiu sira ne’ebé hanesan reprezentasaun diplomátiku,” nia tenik.
Jornalista : Natalino Costa
Editora : Julia Chatarina
