BAUKAU, 09 Setembru 2025 (TATOLI)—Diretór Ospitál Rejionál Eduardo Ximenes (HoREX-sigla portugeza), Claudino Ximenes rejeita informasaun espallada relasiona ho stock out ai-moruk iha Ospitál Baukau.
Claudino Ximenes konsidera informasaun ne’ebé fó-sai iha rede sosiál la bazeia ba realidade tanba ospitál referidu kontinua halo operasaun ka halo atendimentu ba pasiente sira inklui konsumu ai-moruk ne’ebé pesóal saúde sira oferese.
“Se informasaun ne’e loos, entaun ospitál taka ona. Sei loke hela signifika ai-moruk iha hela,” Claudino informa ba TATOLI liuhosi telefónema, Tersa ne’e.
Entretantu, HoREX Baukau nu’udár ospitál iha rejiaun leste ne’ebé aleinde halo atendimentu ba pasiente sira husi Baukau, halo atendimentu mós ba munisípiu tolu seluk hanesan Lautein, Vikeke no Manatutu.
Jornalista: Natalino Belo
Editór: Xisto Freitas da Piedade
