DILI, 12 Setembru 2025 (TATOLI)-Embaixadora Timor-Leste ba Japaun, Maria Terezinha Viegas, hasoru malu ho Primeiru-Ministru (PM), Xanana Gusmão, hodi simu orientasaun molok hala’o misaun diplomátika iha Japaun.
“Hanesan Embaixadora Japaun molok ha’u hala’o ka ezerse ha’u-nia knaar, mai halo audénsia ho primeiru-ministru nu’udar xefe Governu, atu husu orientasaun relasiona ho hau-nia kargu ne’ebé daudaun ha’u asume”, Maria Terezinha hateten iha Palásiu Governu, ohin.
Nia dehan orientasaun ne’ebé nia simu mak primeiru-ministru rekomenda atu kontinua kooperasaun no serbisu sira ne’ebé Embaixadór sesante, Ilídio Ximenes da Costa, halo ona.
“Primeiru-ministru husu hakarak ka lakohi tenke kontinua no estreita liután relasaun bilaterál entre nasaun rua, tanba dezde ita hahú ita-nia independénsia kooperasaun sira ne’e di’ak tebes, liuliu ba Governu Japaun liuhusi JICA ne’e realidade tebes”, dehan.
Tuir nia, xefe Ezekutivu mós husu atu hametin kooperasaun iha área mobilidade traballadór sira intensifika liu no kapasitasaun rekursu umanu nian nomós área investimentu.
Kona-ba data efetivu hala’o misaun iha Japaun, nia haktuir katak Ministériu Negósiu Estranjeiru no Kooperasaun (MNEK) prosesa hela administrativu karik semana ida tan bele dezloka ona bá Japaun.
Lembra katak, iha loron 18 Agostu 2025, Prezidente Repúblika (PR), José Ramos-Horta, fó pose ba Maria Terezinha da Silva Viegas, nu’udar Embaixadora Estraordinária no Plenipotensiária foun Timor-Leste nian ba Japaun, hodi troka Embaixadór sesante, Ilídio da Costa.
Serimónia ne’e marka pasu signifikativu ida hodi hametin parseria estratéjika entre Timor-Leste no Japaun.
Notisía relevante: Xefe Estadu fó pose Maria Terezinha nu’udar Embaixadora Estraordinária ba Japaun
Jornalista : Arminda Fonseca
Editora: Maria Auxiliadora
