DILI, 15 Setembru 2025 (TATOLI)—Estadante Universitáriu Timor-Leste (EUTL) hamutuk ho sosiedade sivil inklui entidade relevante seluk, Segunda ne’e, hahú tuku 08:00 dadeer, halo asaun pasífika iha Parlamentu Nasionál (PN) nia oin, hodi hato’o ezijénsia sira.
Xefe Departamentu Prevensaun Konflitu Komunitáriu husi Komandu Jerál PNTL, Superintendente Polísia Joni Viana hamutuk ho nia ekipa halo aprosimasaun ba estudante universitáriu sira, hodi halo asaun pasífika ne’ebé tuir regra.
“Ohin ami mai iha ne’e atu halo aprosimaun ba ita-nia estudante univertáriu, katak sira bele halo manifestasaun iha ne’e, maibé manifestasaun ne’ebé pasífiku no tenke hato’o aspirasaun no labele iha konflitu,” Superintendente Polísia hateten ba Jornalista sira, iha resintu Universidade Nasionál Timor-Leste (UNTL).
Nia dehan, estudante konkorda katak sira halo manifestasaun iha de’it resintu UNTL no la sai ba estrada.
“Manitensaun ne’e atu hato’o aspirasaun no hanoin sira, ita tenke kumpre regra manitensaun nian, nune’e evita konflitu no bele garante estabilidade,” nia akresenta.
Notísia relevante : PNTL la autoriza EUTL halo manifestasaun iha resintu UNTL
Tuir Superintendente Polísia ne’e,manifestasuan ne’e direitu, maibé tenke la’o tuir regra para evita konflitu.
Ezijénsia husi estudante universitáriu sira mak hanesan, husu ba Parlamentu atu kansela no hapara sosa karreta luxu ba membru sira, halakon Lei Pensaun Vitalísia, alterasaun ba Lei Liberdade Reuniaun no Manifestasuan no alokasaun Orsamentu Jerál Estadu (OJE) ho pursentu boot ba setór produtivu no infraestrutura iha baze.
Iha tempu hanesan, PN halo hela sesaun solena ba abertura sesaun lejizlativa datoluk ba VI lejizlatura nian, hahú tuku 10:00 dadeer ne’e to’o ramata.
Manifestante sira kompostu husi UETL ne’ebé mai husi UNTL, Universidade Dili (UNDIL), Universidade Orientál Timor-Leste (UNITAL) no Universidade da Paz (UNPAZ) hamutuk ho ativista, grupu sosiedade sivil inklui komunidade balun, ne’ebé konsentra hotu ona iha resintu UNTL laran hodi hahú manifestasaun.
Atividade ne’e hetan seguransa másimu husi ekipa seguransa no defeza.
Jornlista : Natalino Costa
Editora : Julia Chatarina
