DILI, 15 Setembru 2025 (TATOLI) – Prezidente Autoridade Munisípiu (PAM), Ermera, José Martinho, hateten konstrusaun estrada Ermera ninia prosesu iha Komisaun Nasionál Aprovizionamentu (CNA, sigla portugés) hotu tiha ona. Agora iha ona Banku Mundiál nia liman, no bainhira Banku Mundiál hasai nota aseitasaun, bele hahú ona halo kontratu ba konstrusaun estrada husi Gleno ba Letefoho.
“Buat hotu-hotu preparadu ona. Maibé sei Banku Mundiál kansela Governu iha solusaun seluk, Governu bele finansia rasik. Hakarak ka lakohi responsabilidade atu hadi’a nasaun, hadi’a estrada, hodi públiku asesu kapitál nasaun ba munisípiu sira-ne’e, responsabilidade Governu nian,” PAM Ermera, dehan ba jornalista sira, iha Delta Nova, segunda ne’e.
La’ós iha autoridade munisípiu
Nia dehan, hanesan Governu Sentrál fiar katak sei hetan apoiu husi Banku Mundiál ba konstrusaun estrada.
“Tuir informasaun ne’ebé ha’u iha konfiante katak ita sei hetan duni apoiu ida-ne’e, la’ós ba estrada Munisípiu Ermera de’it, maibé ba Munisípiu hirak ne’ebé mak sei dependente ba fundu ida-ne’e. Bainhira fundu ne’e aseita ona ita bele hahú kontratu hodi implementa ona konstrusaun ida-ne’e,” nia dehan.
Notísia relevante: https://tatoli.tl/2025/08/29/prosesu-kontrusaun-estrada-iha-ermera-sei-hein-revizasaun-husi-cna/
Maibé nia dehan, ida-ne’e desizaun loloos la’ós iha autoridade munisípiu sira-nia liman, maibé Governu sira-nia liman, tanba daudaun ne’e Governu halo hela esforsu para depoiz trata lalais problema sira lae projetu sira-ne’ebé la’o hela iha kada munisípiu.
“Banku Mundiál halo aseitasaun ba orsamentu mak ita bele halo, tanba sira maka hakarak fó duni orsamentu ba imprestimu atu hadi’a estrada ne’e, nune’e prosesu hotu hein de’it Banku Mundiál hatán loos ona, ita hahú,” nia tenik.
Notísia relevante: https://tatoli.tl/2025/04/15/konstrusaun-estrada-husi-gleno-ba-letefoho-hahu-iha-tinan-nee/
Jornalista : Osória Marques
Editór: Rafael Ximenes de A. Belo
