DILI, 17 Setembru 2025 (TATOLI)–Segundu Komandante Jerál Polísia Nasionál Timor-Leste (PNTL), Komisáriu Polísia Pedro Belo louva ho Estudante Universitáriu Timor-Leste (EUTL) nia esforsu hodi halo diálogu ho membru Parlamentu Nasionál hodi halakon Lei Pensaun Mensál Vitalísia.
“Vitória ne’ebé ohin imi hetan hanesan vitória imi-nian no vitória povu nian, tanba imi-nia pasiénsia, imi-nia aten-brani balun, ran turuk balun to’o tama ospitál mak hetan vitória tanba luta la’ós fásil. Imi-nia maturidade no imi-nia pasiénsia ne’ebé di’ak hodi kontrola maski ita hotu hatene katak loron-tolu ne’e situasaun ne’ebé la favorável, manifestante ne’ebé maka’as maibé imi nafatin kontrola imi-nia emosaun mak ohin ita hamutuk nafatin ohin loron, imi hetan ona vitória ida-ne’e,” Pedro Belo hateten ba UETL iha resintu Universidade Nasionál Timor-Leste (UNTL), hafoin akompaña diálogu entre estudante universitáriu no membru Parlamentu, Kuartane’e.
Komisáriu Polísia dehan, atu rezolve problema ida tenke liuhusi dalan diálogu hodi rezolve problema.
“Ohin loron imi hotu hatudu ona, buka dalan diálogu tanba loron dahuluk gás lakrimujéniu lubuk ida mak kona imi, balun to’o kanek, balun tanis, balun halai no fatuk balun kona mós Polísia sira, maibé imi hambrik tuba rai metin nafatin hodi halo diálogu hodi buka solusaun no ohin hetan vitória,” nia akresenta.
Notísia relevante : EUTL prontu suspende manifestaun no husu líder bankada kumpre akordu
Segundu Komandante akompaña, manifestasaun hahú loron dahuluk to’o loron datoluk ne’e manas maibé estudante universitáriu sira nafatin buka dalan halo diálogu ho Deputadu no Deputada sira hodi hetan solusaun no vitória ne’ebé di’ak ba povu.
“Ita hotu hamutuk nu’udar timoroan, buka diálogu hodi hetan solusaun ba problema hotu-hotu,” pedro Belo katak.
Nune’e, nia husu ba UETL atu serbisu hamutuk Autoridade Seguransa no autoridade sira seluk, karik hakarak ejize buat ruma ba interrese nasionál, presiza koordena malu atubele hetan solusaun.
“Hau husu ba ita hotu atu hakribi violénsia, ita loke dalan ba ema hotu atu buka solusaun, ida-ne’e mak importante liu hodi hetan vitória tanba bainhira imi idaidak filafali ba imi-nia uma karik, la’o ho kuidadu-an tanba joventude timoroan, liuliu Universidade Timor-Leste ne’ebé matenek la’ós hanesan nasaun sira seluk. Ha’u-nia parabéns no parabéns ba imi hotu, hau-nia parabéns ba estudante ne’ebé ohin hatudu duni nia kualidade nu’udar akadémiku, ohin hatudu no hetan vitória, parabéns fila ho di’ak to’o ida-idak nia uma,” Pedro Belo hato’o ba estudante.
Komisáriu Polísia lori instituisaun PNTL nia naran, nia hato’o agradese ba EUTL, ne’ebé luta durante loron-tolu (15-17 Setembru) hamutuk ho sosiedade sivíl no entidade oinoin.
“Vitória neebe ohin imi susesu ne’e vitória ne’ebé ho nia istória tanba uluk kedas imi-nia maun sira luta duni iha fatin ne’e, sira hakilar luta maibé laiha finál no ikus mai ita-boot sira mak hetan susesu,” nia agradese.
Rezultadu husi diálogu ne’e maka Parlamentu halo deklarasaun Bankada Parlamentár ne’ebé asina husi reprezentante husi Bankada Parlamentár lima (CNRT, FRETILIN, PD, PLP no KHUNTO) ho pontu hanesan :
- Hamate pensaun mensál vitalísia, revoga no modifika diploma lejizlativu konsernentes, ho inísiu deskusaun ba jeneralidade iha loron 25 Setembru 2025.
- Revee filafali liberdade reuniaun no manifestasaun
- Bainhira iha debate kona-ba Orsamentu Jerál Estadu (OJE), tenke dezenvolve diskusaun sériu ho Governu ba sentidu atu asegura finansiamentu ba setór produtivu
Jornalista : Natalino Costa
Editora : Julia Chatarina
