BOBONARU, 25 Setembru 2025 (TATOLI)-Pasiente feto ida, tinan 38, husi bairru Natar-laun, aldeia Oat, suku Ritabou, postu administrativu Maliana, munisípiu Bobonaru, mate ho sintomas raiva, hafoin internadu iha Ospitál Referénsia Maliana (HRM, sigla portugés).
Diretór ezekutivu HRM, José Marçal da Cruz, konfirma katak pasiente ne’e transfere husi Sentru Saúde Komunitáriu Maliana iha kinta dader ne’e.
“Agora mate tiha ona. Nia ohin dadeer mai ho sintomas raiva. Ninia sampel foin lori bá teste iha Laboratóriu Nasionál”, diretór informa ba Tatoli via telefone.
Iha sorin seluk, Xefe Sentru Saúde Maliana, Nascimento Mau Leto, reforsa katak pasiente ne’e iha istoriá kazu asu tata iha tinan kotuk.
“Ohin, pasiente ida mai sentru saúde, nia aprezenta katak hodi kalan nia hemu-bee atu muda fali. Depois nia hare bee ta’uk tebetebes. Ami-nia pesoál saúde sira investiga, husu pergunta oioin dehan ita boot keta asu tata? Nia aprezenta dehan iha tinan kotuk, fulan-Outubru. Asu tata nia iha parte ain, la bá sentru saúde hodi aprezenta nia moras. Nia nonook de’it iha uma, ohin loron nia bá hatudu sintoma ida raiva nia”, esplika.
Lembra katak, iha loron 20 fulan ne’e, pasiente mane ida, idade 74, husi suku Lourba, hakotus iis iha Hospitál Nasionál Guido Valadres, Dili, tanba infetadu ho vírus raiva. Husi numeru ne’e, Bobonaru rejista ema na’in-haat mak mate tanba raiva.
Notisía relevante: Ministériu Saúde rejista ona pasiente mate tanba raiva hamutuk 17
Jornalista: Sergio da Cruz
Editora: Maria Auxiliadora
