DILI, 29 Setembru 2025 (TATOLI)-Institutu Kualidade Timor-Leste (IQTL, sigla portugés) seidauk bele inaugura laboratóriu kalibrasaun nian hodi utiliza, tanba sei hein aprovasaun Lei Taxa ba kalibrasaun nian husi Konsellu Ministru.
“Inaugurasaun ba laboratoriu kalibrasaun ne’e proposta haruka ona ba Konsellu Ministru, ami hein aprova hafoin halo inagurasaun. Tanba buat hotu kompletu ona, ita inagura tiha mak lei seidauk aprova, ita dada taxa ladi’ak. Entaun, tenke iha lei mak inaugura para ita uza kedas”, Vogál II IQTL, Gustavo de Oliveira Maia, informa ba Tatoli, ohin.
Nia esplika katak kalibrasaun ba produtu ne’e importante tebes, tanba liuhusi kalibrasaun atu garante ema labele manipula presu produtu sira, inklui kombustivel iha estasioanamentu sira.
“Kalibrasaun ne’e fornese ba kuantidade hanesan kombustivel karik nia litru, mililitru, no miligrama ne’e hira tenke sukat ka kalibra tiha, nune’e ema labele regula ka manipula tanba ita tau segel”, nia dehan.
Kona-ba presu kalibrasaun nian tuir IQTL prevee hahú husi $0,10 to’o rihun $500, tanba depende ba kuantidade ka kapasidade produtu.
Lembra katak, instalasaun ba laboratóriu kalibrasaun ne’e rasik finaliza ona iha Janeiru 2025.
Notisía relevante: Finaliza instalasaun ekipamentu iha laboratóriu nasionál IQTL
Jornalista: Arminda Fonseca
Editora: Maria Auxiliadora
