DILI, 01 Outubru 2025 (TATOLI)—Tribunál Rekursu daudaun ne’e seidauk bele halo promosaun ba juíz sira tuir planu ne’ebé mak iha tanba inspetór sei halo hela nia serbisu hodi avalia serbisu juíz sira iha Tribunál Primeira Instánsia no Tribunál Rekursu.
Prezidente Tribunál Rekursu (PTR), Afonso Carmona rekoñese katak, promosaun ba juíz tuir loloos akontese ona hafoin férias judisiária iha fulan-Setembru ne’e maibé tanba inspetór ne’ebé antes ne’e nia kontratu hotu, entaun Tribunál Rekursu kontrata fali inspetór foun, agora nia hala’o hela hela nia serbisu iha Tribunál Primeira Instánsia Dili hodi hahú halo inspesaun ba juíz ida nia serbisu.
“Ita garante tinan ne’e nia-laran ita sei halo promosaun ba juíz sira, tanba ne’e inspetór sei halo serbisu,” PTR Carmona hateten ba Ajénsia TATOLI iha Kolmera, Kuarta ne’e.
Nia dehan, kritériu ba promosaun juiz ne’e rigór, juíz tenke serbisu tuir lei haruka tanba avalizaun foku liu ba serbisu juíz nian.
“Pur ezemplu nia atende prosesu ida tama ne’e oinsá. Desde nia simu nia halo despaisu saida, to’o julgamentu no to’o arkivu, ida-ne’e mak ema haree hotu, liuliu ba nia andamentu ne’e, nia (juíz) viola regra ka lae, se la viola regra, entaun muito bom, se viola regra entaun hein,” nia katak.
Notísia relevante : PTR rekoñese fatór tolu sai dezafiu ba estabelesimentu Supremu Tribunál Justisa
PTR dehan, kuandu juíz ida mak iha avaliasaun hetan bom maka nia iha direitu atu halo promosaun.
“Bom ne’e di’ak, ó hetan bom pois la promove ne’e oinsá mak ne’e. Tanba ne’e bom ne’e bele iha direitu atu hetan promosaun mós,” Carmona tenik.
Prezidente Tribunál Rekursu hatutan, ba promosaun juiz, hein de’it rezultadu serbisu husi inspetór tanba agora nia halo hela serbisu, nune’e hanesan Prezidente Tribunál labele pronúnsia buat ruma, hein de’it relatóriu husi inspetór.
“Promosaun ida-ne’e ita sei hahú juíz terseira klase promove ba segunda klase, husi juíz segunda klase sei promove ba primeira klase, juíz primeira klase sei promove ba juíz dezembargadór no juíz dezembargadór sei promove ba juíz Konselleiru hodi ba juíz ne’ebé serbisu iha Supremu Tribunál Justisa ne’ebé ita sei instala iha tinan oin tuir planu ne’ebé iha ona,” nia katak.
Jornalista : Natalino Costa
Editora : Julia Chatarina
