VIKEKE, 07 Outubru 2025 (TATOLI)—Ministru Obra Públika, Samuel Marçal husu Autoridade Munisípiu Vikeke atu aprezenta dadus aldeia sira-ne’ebé seidauk asesu ba eletrisidade hodi Governu tau ba planu prioridade 2026.
“Ha’u husu ba xefe suku no xefe aldeia sira katak iha aldeia ruma ahi seidauk tama karik fó lista ba ami, atu ami akumula hodi ita halo konkursu dala ida, nune’e iha 2026 no 2027 ita bele konklui eletrisidade iha nivel aldeia nian,” Ministru Samuel Marçal hateten iha Postu Administrativu Vikeke Vila, Tersa ne’e.
Ministru Marçal dehan durante tinan rua nia laran MOP konsege rezolve eletrisidade iha nivel suku iha territóriu.
“Ha’u asume kna’ar durante tinan rua nian laran ita konsege rezolve eletrisidade iha nivel suku sira iha territóriu, maibé iha aldeia hamutuk 182 mak seidauk asesu eletrisidiade. Nune’e, ba tinan ida-ne’e, ita sei tenta bazeia ba orientasaun husi Primeiru-Ministru atu hahú konklui elestrisidade ba aldeia sira-ne’ebé ahi seidauk tama. Ita hotu espera iha tinan oin (2026) aldeia sira-ne’ebé seidauk asesu eletrisidade bele asesu hotu,” Marçal dehan.
Notísia relevante: Abitante Uma-Ki’ik preokupa empreza Uca-Aba abandona projetu eletrifikasaun
Iha fatin ketak, Koordenadór Eletricidade de Timor-Leste, Empreza Públika (EDTL, E.P.), Eduardo Sarmento hateten EDTL, E.P. aprezenta ona dadus aldeia ne’ebé seidauk asesu eletrisidade ba nasionál no daudaun ne’e iha ona planu estabelese pakote.
“Kona-ba dadus aldeia sira-ne’ebé seidauk asesu ba ahi ne’e ita aprezenta ona, ne’ebé ita hein de’it prosesu bainhira mak fó-sai pakote ba aldeia sira iha Munisípiu Vikeke. Munisípiu Vikeke hela aldeia uitoan mak seidauk asesu ba ahi,” nia haktuir.
Iha Postu Administrativu Uatulari, Suku Uaitame, uma-kain hamutuk 55, husi aldeia Foho Manu no Aldeia Makadike ne’ebé hela iha área Uailalika seidauk asesu eletrisidade no Suku Makadike Uaitame uma-kain 200 hela foho mós seidauk asesu eletrisidade ne’e.
Iha 2025, Munisípiu Vikeke nian iha aldeia tolu (3) mak EDTL, E.P. hahú instala eletrisidade hanesan Postu Uatulari parte Sana no Ossokaiua. Enkuantu, Postu Vikeke Vila, liuliu iha Suku Uma-Ki’ik kompostu husi aldeia tolu mak seidauk asesu eletrsidade maibé agora instalasaun la’o hela. Suku Bibileo iha aldeia rua no Suku Uaimori mós iha aldeia rua seidauk asesu eletrisidade.
Jornalista: Vitorino Lopez da Costa
Editór: Xisto Freitas da Piedade
