VIKEKE, 07 Outubru 2025 (TATOLI)—Prezidente Autoridade Munisípiu (PAM) Vikeke, Francisco Cruz Simões de Gonzaga Soares, aprezenta kondisaun estrada postu tolu ne’ebe durante ne’e sai obstákulu ba movimentu transporte iha Munisípiu Vikeke ba Ministéru Obra Públika (MOP) atu solusiona.
“Iha Vikeke kondisaun estrada postu tolu ne’ebé durante ne’e difikulta ita-nia populasaun mak hanesan estrada husi Uatukarbau to’o Postu Uatulari, husi Uatulari to’o Vikeke Vila no estrada Asalaitula. Tan ne’e, ha’u hakarak aprezenta ba Ministériu Obra Públika (MOP) hodi fó-atensaun ba ita-nia estrada sira-ne’e atu rezolve,” Francisco hateten iha Postu Vikeke Vila, Tersa ne’e.
Notísia relevante: https://tatoli.tl/2025/06/09/smop-vikeke-propoin-ona-estrada-diresaun-uatukarbau-uatulari-ba-nasional/
Autoridade ne’e esplika estrada mak sai hanesan preokupasaun ba povu Vikeke tomak, tanba ne’e rekizitu ida ba desentralizasaun no poder lokál.
Iha fatin hanesan, Administradór Postu Vikeke Vila, Leopodo da C. Alves haktuir kondisaun estrada ne’ebé identifikada aat mak hanesan husi Suku Uma-Ua’in Leten, Suku Bibileo, Bahalarauain no Suku Luka.
“Oportunidade ida-ne’e ha’u hakarak relata ba MOP liga ba povu nian preokupsaun liuliu ba estrada sira iha Postu Vikeke Vila, ne’ebé agora nia kondisaun aat. Tempu udan difikulta tebetebes ita-nia povu sira. Nune’e, ha’u lori povu Vikeke Vila nia naran rekomenda ba MOP atu fó-atensaun ba estrada sira-ne’e. Ha’u espera katak preokupasaun povu nian MOP bele tau ba iha planu prioridade,” nia hato’o.
Hatán ba preokupasaun ne’e, Ministru Obra Públika (MOP), Samuel Marçal hateten tinan ida-ne’e Governu sei tau osan hodi fó ba estrada sira iha nasionál no estrada´área rurál.
“Ita-nia Primeiru-Ministru (PM) bolu ha’u hodi fó-atensaun ba estrada rurál. Iha tinan ida-ne’e ita halo estrada lubuk ida, maibé estrada barak mak ita seidauk konkluidu. Espera tinan oin ita tau orsamentu hodi konklui estrada sira,” Marçal tenik.
Jornalista: Vitorino Lopez da Costa
Editór: Xisto Freitas da Piedade
