OEKUSI, 17 Outubru 2025 (TATOLI) – Diretór Diresaun Rejionál Edukasaun no Solidariedade Sosiál, Vincencio Cono, informa, hahú husi loron segunda 20 to’o 26 Outubru 2025, prosesu aprendizajen iha Rejiaun Administrativa Espesiál Oekusi Ambeno (RAEOA), suspende ka pauza hodi fó oportunidade ba estudante sira atu konsentra ba ezame nasionál no ezame lokál.
“Iha segunda loron 20 to’o 24 Outubru 2025 tama ba kaléndariu ezame nasionál inklui loron sexta no sábadu ezame lokál, nu’udar ezame ba finalista 2025, sira-ne’ebé sétimu no oitavu ano ba ensinu báziku désimu no désimu primeiru ano ba ensinu sekundáriu no tékniku vokasionál. Sira sei pauza ka suspende prosesu aprendizajen semana ida, maibé iha de’it sentru realizasaun ezame nasionál,” nia relata ba Ajénsia Tatoli,I.P iha Oekusi, ohin.
Notísia relevante:Estudante Oekusi rihun-tolu resin rejistadu sei partisipa ezame nasionál
Ezekutivu ne’e informa, estudante sira-ne’ebé iha ensinu báziku, sei partisipa ba ezame pasajén klase iha fulan-Novembru loron 17 to’o loron 22 Novembru 2025, maibé depoisde ida-ne’e, profesór sira sei realiza mós prova literásia no numerasia ba estudante sextu ano sira, atu pasa ba sétimu ano labele pasa ho analfabetu.
“Tan ne’e laiha feriadu ba edukasaun pré-eskolár sira, no laiha feriadu ba ensinu báziku primeiru no segundu siklu, laiha feriadu ba fasilitadór sira-ne’ebé fasilita ba sentru programa intensivu ba edukasaun pré-eskolár iha Oekusi ne’ebé eziste 12, atu prepara sira atu asesu ba primeiru ano eskolaridade ensinu báziku,” nia hateten.
Autoridade edukasaun ne’e esplika, pauza ka suspensaun ne’e la’ós hasai ho sirkulár maibé liuhusi aviza direita ba estudante sira, tanba sala sira iha eskola idak-idak okupadu ba kandidatu finalista sira, tanba kada tinan, bainhira ezame nasionál estudante hotu labele ba eskola, maibé silénsiu iha uma hodi estuda atu prepara ba ezame pasajén klase.
Notísia relevante:Edukasaun Oekusi emite sirkulár regula legalizasaun diploma no deklarasaun kréditu
Iha fatin seluk, Koordenadór Eskola Sekundáriu Jerál Santo António Oekusi, Arselindo da Cunha Bobo, konfirma katak, daudaun ne’e sira prepara estudante finalista hamutuk 232 partisipa ezame nasionál no ezame lokál, inklui prepara mós fasilidade sira.
Enkuantu, iha loron sesta ohin, husi eskola fó-sai ona aviza ba estudante sira désimu ano no désimu primeiru ano, hodi fila ba uma hakmatek, durante semana ida, la’ós fó sira atu feriadu, maibé fó tempu hodi hakmatek no estuda iha uma.
“Ami-nia preparasaun agora prepara hela, estudante sira nia kartaun ezame nian, no fasilidade eskola, nune’e loron segunda agora sira bele tuir ona tanba estudante 12 ano no 9 ano sira mak prepara atu tuir ezame nasionál no ezame lokál,” nia hateten.
Nia informa husi 232 ne’e, fahe ba departamentu rua, siénsia teknolojia no sosiál, sei akumula saladeaula 11. Bainhira ezame nasionál hahú, mak estudante ida hetan dezastre ka moras presiza informa ba vijilante sira, no komisaun hodi haree no buka fatin seguru hodi tuir ezame nasionál ho di’ak no seguru.
“Ita-nia mensajen husi eskola ba estudante sira, katak fulan-Outubro ne’e, fulan rosário entaun labele haluha reza, no esperansa katak sira sei estuda hodi hetan rezultadu ho di’ak. Tanba hakmatek sei hadook aan husi tentasaun, no agora mós tentadór barak, ne’ebé baibain minutu ikus tuir ezame sempre problema. Tan ne’e, ami enkoraza estudante sria hodi hakmatek, nune’e bele tuir ezame nasionál ho di’ak, no hakmatek estuda iha uma, hodi tuir ezame lao ho di’ak,” nia fó hanoin.
Notísia relevante:MESSK disemina kritériu rejime jerál no espesiál asesu UNTL-IPB iha Oekusi
Jornalista: Abílio Elo Nini
Editór: Rafael Ximenes de A. Belo
