DILI, 28 Abríl 2026 (TATOLI)—Jornalista sénior Timor-Leste, Otélio Ote, hakotu ona iis iha Ospitál Rejionál Oekusi Ambenu iha madrugada tuku 03:35 Otl, Tersa ne’e.
Fundadór Jornál Diáriu Timor Post ne’e hahú baixa iha ospitál referidu iha loron-11 Marsu 2026, tanba enfrenta moras komplikadu.
Constâncio Ote nu’udár alin husi matebian sente triste tebes tanba lakon maun, aman no ema matenek ida-ne’ebé durante nia vida tomak serbí família no nasaun liuhusi área jornalizmu.
“Ami sente lakon ema di’ak ida iha ami-nia leet no timoroan ne’ebé hala’o profisaun jornalizmu mós lakon sira-nia sénior ida tanba matebian durante tinan naruk (dezde 1987) dedika nia an ba profisaun ida-ne’e hodi forma timoroan barak sai jornalista,” Constâncio dehan ba jornalista iha mortuáriu Ospitál Rejionál Oekusi Ambenu.
Nia informa katak família sei lori-hikas atuál asesór média Gabinete Rejiaun Administrativa Espesiál Oekusi Ambenu (RAEOA) nia kadáver bá Dili hodi hatuur iha nia rezidénsia, iha ohin ka tarde liu aban, hodi hafásil família husi profisaun oioin nia vizita.
Entretantu, Otélio Ote nia kolega jornalista antigu no kolega fundadór Jornál Diáriu Timor Post hanesan José Maria Ximenes no Santina Araújo Santos hato’o sira-nia sentimentu triste ba novidade ne’e liuhusi sira-nia pájina Facebook.
“Rona novidade triste ha’u laran triste. Ha’u lahatene atu deskreve saida ba maun Ote, maibé ida-ne’e mak realidade moris. Ohin O husik ami ne’ebé ita hamutuk funda Timor Post, husik O nia kómiku sira, husik O nia badinas sira, husik O nia mundu jornalizmu ne’ebé O hadomi iha vida tomak. O husik memória iha mundu jornalizmu. Deskansa iha pás iha O nia mundu foun maun Ote. Ha’u-nia sentidu kle’an ba Lita ho oan sira, Constâncio Ote no família enlutada sira hotu,” José Ximenes deskreve ho laran triste.
Aleinde ne’e, Santina Araújo Santos mós hato’o ninia sentimentu triste ba novidade moruk ida-ne’e.
Nia kakfodak bainhira hetan mensajen iha tuku 04.00 madrugada dehan maun Otélio OT husik ona nia pregrinasaun iha mundu ne’e.
“Maun Ote, obrigada ba ita servisu hamutuk iha tempu okupasaun Indonézia iha Suara Timor Timur (STT) no hamutuk hodi harii Mídia Timor Post no Sentru Formasaun Jornalizmu Timor Post,” nia haktuir.
“Ita-nia dedikasaun no kontribuisaun iha mundu jornalizmu, husi tempu Indonézia to’o era independénsia sei sai memória ida-ne’ebé ami sei lahaluha. Adeus maun no mestre Otélio Ote. Sentidu kondelénsia kle’an ba mana Lita ho oan no beioan sira ne’ebé mak maun husik hela,” nia hatutan.
Jornalista: Osória Marques
Editór: Xisto Freitas da Piedade
