DILI, 21 Outubru 2025 (TATOLI)—Governu liuhusi Ministériu Saúde (MS) Gabinete Lisensiamentu Rejistu Atividade Saúde hahú verefika no análiza dokumentu husi empreza Star King Medical Center antes halo tratamentu saúde ba públiku iha sentru refere.
Notísia Relevante: Starking Medical Center prepara ona rekursu umanu
Diretór Nasionál Gabinete Lisensiamentu Registu Atividade Saúde, Nuno da Costa, hateten MS simu ona dokumentu husi empreza Star King atu haree no análiza, didi’ak dokumentu sira antes loke ba públiku.
“Loos duni, dokumentu ha’u simu ona husi Star King ne’ebé foin submete iha kinta semana kotuk, submete ona mai ha’u-nia fatin maibé hetan despaixu husi Ministra Saúde maibé agora kabe ba kompeténsia ne’ebé iha, ita haree no analiza, ita verifika depois mak ita foin fó sira la’o tuir dalan, maibé dokumemtu ha’u simu ona,” Nuno da Costa hateten ba jornalista sira iha Kaikoli, tersa ne’e.
Nia esplika, kona-ba Star King nia estatutu atu loke klínika ou ospitál boot, maibé depende ba dokumentu ne’ebé submete no rezultadu verifika no análiza ramata mak foin bele autoriza ka seidauk.
“Sira-nia dokumentu ne’ebé mak submente mai ha’u haree katak, sira atu halo estabelesementu ospitál ida (1) iha ne’ebá, agora ita halo hela análiza hela ba dokummtu sira-ne’e hotu. Ita seidauk bele fó sai, bainhira dokumentu sira-ne’e ita sei halo verifikasaun, ba espesializadu balun ne’ebé mak sira presta iha ne’ebá,” nia dehan.
Antes ne’e, Diretór Empreza Star King, Lay Siu Hing, infoma katak Star King Medical Center prontu servisu hamutuk ho Governu Timor-Leste hodi halo tratamentu saúde iha rai-laran.
“Bainhira Ospitál ne’e, prontu mak Governu hakarak atu servisu hamutuk ho Star King ami prontu, nune’e bele fó atendementu liuliu sira-ne’ebé mak kbiit laek atu ba rai-li’ur, bele halo tratamentu iha ne’e,” Lay Siu Hing hateten.
Nia dehan, orsamentu ba konstrusaun Ospitál referidu hamutuk millaun $15 no Ospitál ne’e foka ba tratamentu, espesializada sira hanesan fuan, neorolojia, kankru nomós kemoterapia.
Nia hatutan, kona-ba médiku ne’ebé atu halo atendementu iha Ospitál ne’e balu sei mai husi estranjeiru hanesan Kuba, Indonézia, Malázia no envolve mós Doutór espesialista timoroan balun.
Enkuantu, ekipamentu ne’ebé sei utiliza iha Ospitál ne’e mak hanesan Magnetic Resonance Imaging (MRI), CT-Scan, catlqp, X-ray no seluk tan ne’ebé hodi halo atendimentu ba moras oioin.
Notísia Relevante: Starking Medical Center prontu apoiu Governu fasilita tratamentu saúde iha rai-laran
Jornalista : Felicidade Ximenes
Editór : Cancio Ximenes
