DILI, 21 Outubru (TATOLI)—Ministériu Saúde (MS) rejista ema mate ba kazu rabies hamutuk 21 husi Munisípiu hitu hanesan Kovalima, RAEOA, Manatutu, Ermera, Manufahi, Bobonaru no Likisa iha 2025.
Notísia Relevante: 2024-2025, timoroan 18 mate iha HNGV tanba Raiva
Ofisiál Kontrolu Raiva iha Ministériu Saúde, Francisco Xavier Viana, hateten iha tinan 2025 ema mate ho kazu raiva iha RAEOA ema na’in-lima (5) mate, Kovalima na’in-hitu (7) mate, Bobonaru na’in-haat (4) mate, Ermera na’in-tolu (3) mate, Manatuto na’in-ida (1) mate, Manufahi na’in-ida (1) mate no Likisa na’in-ida (1) mate.
“Durante ita fó formasaun kona-ba prevensaun no kontrolu raiva iha Timor-Leste ba pesoál saúde sira iha munisípiu hitu ne’ebé afetadu ba raiva,” Francisco Xavier Viana hateten afirma ba jornalista sira, iha CNE, Kolmera, ohin.
Nia relata katak husi Outubru 2024 to’o 2025, asu kazu asu tata ema ne’e liu 40.000 maibé na’in-22 de’it mak pozitivu ba raiva no mate.
Iha fatin hanesan, Jestór Vijilánsia Epidemiolójika iha Departamentu Saúde Munisípiu Bobonaru, Zito Viegas da Cruz, nota katak bazeia ba dadus ne’ebé iha asu tata hamutuk 452, maibé kazu pozitivu na’in-haat (4) mak mate.
“Ami relata dadus kona-ba asu tata iha totál kazu asu tata hamutuk 452. Asu 21 mak hetan pozitivu ba raiva maibé totál ema na’in-haat (4) ne’ebé konfirmadu ho moras raiva lakon sira-nia vida,” nia hateten.
Nia esplika, Ministériu Saúde hamutuk ho Departamentu Veterinária hodi promove sensibilizasaun iha Postu Administrativu no iha suku sira-ne’ebé risku ba moras raiva.
“Iha Bobonaru, maiória asu tata iha zona urbana akontese iha kapitál munisípiu, Postu Administrativu Maliana, tuir Atabae no Kailaku,” nia dehan.
Jornalista : Felicidade Ximenes
Editór : Cancio Ximenes
