KOVALIMA, 23 Outubru 2025 ( TATOLI)– Xefe Suku Lalawa, Jeferino de Jesus, husu ba Servisu Munisipál Agrikultura (SMA) Kovalima atu hadi’a irrigasaun Damuk ne’ebé lokaliza iha Postu Administrativu Tilomar,Munisípiu Kovalima.
“Kanalizasaun irrigasaun mota Damuk, ha’u sempre kestiona iha enkontru sira, maibé seidauk tau iha planu. Ita hotu hatene rai pontesial liuliunatar iha suku Maudemo no Lalawa, Postu Administrativu Tilomar abandona ka la uza hodi halai natar tanba irrigasaun ladi’ak hodi fornese bee ba natar”, dehan Jeferino de Jesus, dehan ba jornalista sira iha AMC, ohin.
Nune’e, Xefe Suku ne’e dehan presiza duni hadia irrigasaun hodi hasa’e produsaun hare kulit, tanba rai barak maka abandona la’ós agrikultór maka baruk teen, maibé bee mak laiha.
Iha fatin hanesan, Xefe Zulo, João de Carvalho Lopes, rekomenda ba Diretór Servisu Munisipál Agrikultura atu konsidera prosposta husi hadi’a irrigasaun, nune’e halo alargamentu natar hodi agrikultór sira bele halai natar ho di’ak.
Hataan ba Kestaun ne’e, Diretór Servisu Munisípiu Agrikultura Kovalima, Lino Magno reponde katak, Servisu munisipál Agrikultura Kovalima tau ona iha planu atu hadia kanal irirgasaun Damuk, Postu Tilomar, Munisípiu Kovalima.
“Ita tau ona iha planu ati hadi’a irrigasaun iha mota Damuk tanba ne’e resposabilidade munisípiu nian tanba kanal irrigasaun ne’e ho kanal ki’ik. Tanba irrigasaun ho kanal boot ne’e husi nasionál maka halo”, nia promete.
Tuir dadus husi Servisu Munisipál Agrikultura Kovalima, produsaun hare kulit iha 2025, mai husi postu administrativu haat hanesan postu Administrativu Zumalai,Tilomar , Fatumea no Suai atinje tonelada 3.013.
Notisia relevante: MAPPF no empreza Minarta asina akordu hodi konstrui irrigasaun Maukola-Kovalima
Jornalista:Celestina Teles
Editór:Florencio Miranda Ximenes
