DILI, 27 Outubru 2025 (TATOLI)—Institutu Geosiénsia Timor-Leste (IGTL, sigla portugés), liuhusi Diretór Ezekutivu Divizaun Hidrojeolójia no Enjenária Geolójika, Joanico Pires, informa kona-ba rai nakdoko ne’ebé akontese ohin dadersan madrugada tuku 02:04 dadeersan ho ninia magitude 6.1 (intensidade fraku), normalmente sei la fó indikasaun ba tsunami (tasi sa’e).
“Rai nakdoko ohin dadersan madrugada ne’e akontese iha norte tasi rejiaun Oekusi ho ondas profunidade bada kuaze kilometru 82 no lokalizasaun distánsia entre provínsia Nusa Tengara Timur (NTT) Indonézia ho Timor-Leste ne’e kuazé metru 183,3 no kauza husi rai-nakdoko tanba plaka rua soke malu,” Diretór ne’e informa ba Agência Tatoli liuhusi telefone, ohin.
Dirijente ne’e esplika katak provínsia ne’ebé mak sente besik liu ho rai-nakdoko ne’e husi parte Indonézia no Timor sorin balun (Oekusi) maibé ho eskalaun II to’o III, no eskalaun refere hatudu intensivu fraku tamba eskalaun ne’ebé maka’as hahú husi eskalaun IV ba leten.
“Impaktu husi rai-nakdoko ida-ne’e hatudu nivél soke ida ne’ebé kategoriza ba eskalaun intensidade fraku (weak) iha area hanesan Vikeke, Manufahi, Manatutu, Baukau, Ainaru, Dili, Aileu, Ermera, Likisa, Bobonaru, Kovalima no Oekusi,” nia afirma.
Rai-nakdoko ida ne’e kauza husi atividade tatohar (Falha) thrust fault iha tasi Oekusi no haree husi nia profundidade (hiposentru) rai-nakdoko ida-ne’e kategoriza ba tipu rai-nakdoko badak (shallow earthquake) no laiha indikasaun ba tsunami.
Tanba ne’e, nia husu ba komunidade hotu atu labele pániku, tanba akontesementu ida hanesan ne’e normál bainhira plaka rua soke malu iha tasi okos ne’ebé kle’an kuazé metru 75.
Enkuantu, tuir informasaun ne’ebé fó sai husi Ajénsia Meteorolojia Klimatolojia no Geofízika (BMKG, sigla Indonézia) rai nakdoko ne’ebé provínsia Nusa Tengara Timur (NTT) sente ho magnitude 6.3, akontese iha tasi kuazé kilometru 75, no parte ne’ebé afeta ho eskalaun I to’o IV mak hanesan Maumere, Kefamenanu, Ende, Kupang, Waingapu, Larantuka, Lembata, Niki Niki no Alor, enkuantu Timor-Leste mós sente ho eskalaun II to’o III.
Jornalista : Alexandra da Costa
Editór : Cancio Ximenes
