OEKUSI, 10 Novembru 2025 (TATOLI) – Diretora Diresaun Serbisu Saúde Rejiaun Administrativa Espesiál Oekusi Ambeno (RAEOA), Merita Marques Lafo, rekomenda ba Misaun Lepra Timor-Leste (MLTL) atu reativa ka ativa hikas atendimentu saúde ba klínika São Lazaro, ne’ebé konstrui dezde 2010 iha igreja Oélbamba’i suku Usitasa’e sub-rejiaun Oésilo atu fó asisténsia saúde ba pasiénte lepra sira.
Merita Marques Lafo, konsidera klínika referida nesesáriu ba komunidade sira suku tolu, Bobometo, Usitasa’e no suku Usitaqueno, atu bele asesu ho distánsia besik.
“Dezde uluk parseriu ne’ebé harii ona klínika iha Oélbamba’i, atu fó atendimentu ba pasiente lepra nian, maibé to’o agora la konsege funsiona, ita espera no husu, ba futuru Misaun Lepra Timor-Leste, bele funsiona ona edifisíu ne’e, nune’e ita-bele halo ona scraning (triajen) ba moras lepra ba komunidade sira iha Oésilo,” nia hateten iha igreja Oélbamba’i, ohin.
Hatan ba rekomendasaun ne’e, Padre Frezidor Yosep Java, nu’udar membru board Misaun Lepra Timor-Leste, esplika katak, bainhira atu reativa hikas klínika referida ba atendimentu moras lepra nian, parte Misaun Lepra sei koordena ho diosese Dili no konfirma ho igreja parókia mak deside.
Atu ativa fali klínika ne’e, ita presiza koordena lai ho diosese no parókia sira, atu haree ba fasilidade sira, liu-liu bele halo scraning, bainhira iha suspeita ruma ba moras lepra, presiza mós ekipamentu adekuadu, mikroskopu tenke iha, maibé ne’e mós tama ona iha planu ba koordenasaun ho diosese, tanba ne’e diosese nian,” nia hateten.
Notísia relevante: https://tatoli.tl/2025/01/28/mltl-husu-hapara-estigma-sosial-hasoru-pasiente-lepra/
Entretantu, klínika moras lepra ne’e, konstrui iha 2010 ho apoia husi kooperasaun ho España liuhusi pastorál ba saúde, ne’ebé halo inaugurasaun husi bispu matebian Dom Alberto Ricardo da Silva.
Observasaun jornalista Ajénsi Tatoli,I.P, nota klínika referida laiha fasilidade no laiha atendimentu, maibé nafatin iha morru protesaun haleu, no laiha estragu husi animál.
Notísia relevante: https://tatoli.tl/2025/11/10/saude-oekusi-halao-akampamentu-triajen-masal-no-konsulta-espesialidade-iha-oesilo/
Jornalista: Abílio Elo Nini
Editór: Rafael Ximenes de A. Belo
